Presidentja e Kosovës, Vjosa Osmani, gjatë qëndrimit të saj në Shtetet e Bashkuara të Amerikës, më saktësish në një organizim të bërë në Uashington në Universitetin Johns Hopkins, ka folur për një sërë çështjesh. Kriza politike në vend e krijuar për shkak të ngërçit në kuvend, dialogu Kosovë-Serbi, e deklaratat e presidentit të SHBA-ve, Donald Trump, kanë qenë disa nga temat e prekura nga presidentja në deklarimin e saj.
Për të parën çështje, Osmani theksoi se tashmë janë edhe pak më shumë se dy javë nga përfundimi i afatit 30 ditor të vendosur nga Kushtetuesja për konstituimin e Kuvendit.
Lidhur me këtë e njëjta, bëri thirrje në drejtim të të gjithë akterëve politikë për që sa më shpejtë të sigurojnë votat për themelimin e institucioneve.
“Ka shumë gjëra të tjera që po dëmtojnë interesat e shtetit dhe të qytetarëve tanë. Prandaj unë vazhdimisht i bëj thirrje liderëve që të sigurojnë numrat sa më shpejt që të jetë e mundur. Por sigurisht ata kanë çështjet e tyre në mendje, dhe tani Gjykata Kushtetuese në një vendim ka vendosur një afat prej 30 ditësh, i cili skadon më 26 korrik – tani nuk më kujtohet saktësisht data e sotme, por është 10 korriku – kështu që kanë mbetur pak më shumë se dy javë, që do të thotë se nuk ka shumë kohë, dhe ne kemi punuar me partitë për të siguruar që ky afat të respektohet”, deklaroi dje Osmani mes tjerash.
Presidentja foli dje edhe për çështjen e dialogut Kosovë-Serbi, duke theksuar nevojën për një rol shumë më të fuqishëm i Shteteve të Bashkuara të Amerikës në këtë proces .
Osmani tha se nëse “duam sukses”, atëherë SHBA-të duhet të jenë në tavolinën e dialogut dhe t’i japë drejtim përpjekjeve.
“Trump po tregon që ka vëmendjen tek Ballkani Perëndimor, veçanërisht tek Kosova dhe Serbia. Duhet një rol më i fuqishëm amerikan. Nëse duam sukses, duhet Amerika në tavolinë”, theksoi dje Osmani, shkruan Gazeta Express.
Përveç këtyre, presidentja e vendit, komentoi edhe deklarimet e presidentit amerikan, Donald Trump, i cili ka thënë se ka parandaluar një sulm të Kosovës nga Serbia.
Osmani konfirmoi dje këto deklarata e të Trump, duke theksuar se bëhet fjalë për zhvillimet shumë të fundit.
E njëjta tha se kjo përpjekje e Serbisë është e ditëve të fundit dhe se njëjta po vazhdon.
“Presidenti Trump e ka parandaluar një përshkallëzim të mundshëm së fundi. S’po flasim për vitin 2023 apo 2020. Po flasim për zhvillimet shumë të fundit. Por KFOR-i është aty dhe ne po bëjmë punë të mrekullueshme në parandalim e mbrojtje. Është përpjekje e ditëve të fundit, e cila ende po vazhdon. Kam informacione shumë kredibile. E di çfarë po flasë’, deklaroi dje Osmani./GazetaExpress/
