Kompania “Liri-Med”, e drejtuar nga Lirim Mustafa, është gjobitur për disa dështime në furnizimin me produkte në Qendrën Klinike Universitare të Kosovës (QKUK), ku ka dyshime për ndikimin negativ të disa produkteve në pacientë.
Në një nga rastet kryesore lidhet me përdorimin e një kontrasti jojonik, i cili dyshohet se ka shkaktuar reaksione tek disa pacientë.
Edhe pseIndeksOnline ka kontaktuar disa herë këtë operator ekonomik për të marrë një përgjigje lidhur me këtë çështje, ata kanë refuzuar të komentojnë në lidhje me këtë çështje.
Në përgjigjen e Shërbimit Spitalor Klinik dhe Universitar të Kosovës për IndeksOnline, është theksuar se gjatë përdorimit të kontrastit në Shërbimin Pediatrik-Radiologjik, janë raportuar raste të mundshme të efekteve anësore. Ky rast është lajmëruar tek organet kompetente, të cilat janë duke e analizuar situatën.
“Si institucion, kemi ndërmarrë të gjitha masat e nevojshme dhe ato janë lajmëruar në kohën e duhur”, thuhet në përgjigjen e SHSKUK-së.
Për më tepër, Shërbimi Spitalor Kliniko-Universitar njoftoi se, pas rekomandimit të Inspektoratit Farmaceutik, shpërndarja e këtij produkti është ndërprerë deri në një vendim të mëtejshëm nga organet kompetente.
“Deri në një vendim të dytë, shpërndarja e këtij produkti është pezulluar dhe do të presim përgjigje nga organet kompetente”, u tha në përgjigjen e SHSKUK-së.
IndeksOnline mëson se Shërbimi Spitalor Klinik dhe Universitar ka ndëshkuar kompaninë “Liri-Med” për disa shkelje të tjera, duke i vendosur gjobë për disa produkte që nuk i përmbushin standardet e kërkuara.
Më poshtë janë listuar disa nga produktet për të cilat kompania ka marrë gjobë.
