Pas takimit të së martës ndërmjet kryenegociatorëve në Bruksel, palët ishin marrë vesh që deri sot të dërgonojnë propozimet e tyre në Bruksel për atë se si e shohin zgjidhjen e problemit me dinarin pas hyrjes në fuqi të Rregullores së re të BQK-së, rregullore të cilën kryeministri Albin Kurti ka refuzuar në mënyrë kategorike që ta pezullojë.
Në një konferencë për media të mbajtur sot në Qeveri, kryeministri Albin Kurti, është pyetur se cilat janë propozimet që Kosova i ka dërguar BE-së meqë sot është afati i fundit. Kreu i Qeverisë ka thënë se ende s’ka përfunduar dita e premte, duke lënë të kuptohet se Kosova ende s’ka dërguar ndonjë propozim në Bruksel.
“Ende s’ka përfunduar dita e sotme për dërgimin e propozimeve tona. BQK është lartë edhe para. Përveç që kanë marrë rregullore të re nga 27 dhjetori e vendimin plotësisht të pavarur, kanë ofruar edhe plan 10 pikësh për tarnzicion. Nëse ka pasoja në terren, në iu përgjigjemi. Ne s’jemi as lokomotiva as vagoni i parë”, ka thënë Kurti.
Lidhur me çështjen e dinarit dhe përpjekjet që po bëhen nga BE për të gjetur një zgjidhje, ka folur sot edhe Ndihmës Sekretari Amerikan i Shtetit, James O’Brien. O’Brien ka thënë se miqtë e Kosovës do të dëshironin që kjo rregullore të rishqyrtohej dhe të zbatohej në mënyrë që t’ua mundësojë serbëve lokalë të paguajnë për gjërat e përditshme.
Ai ka thënë se kjo nënkupton marrjen e një hapi prapa, dhe lejimin e hyrjes së një valute, euro apo dinarë. Për këtë çështje ka thënë se është duke diskutuar emisari sllovak, Miroslav Lajcak.
“Miqtë e Kosovës tani po thonë që do të dëshironin që kjo rregullore të rishqyrtohej dhe të zbatohej ashtu që u mundëson qytetarëve të vet që të paguajnë për gjërat e përditshme. Kjo nënkupton marrjen e një hapi mbrapa, lejimin e hyrjes së ndonjë valute, euro, dinarë, kjo është diçka për të cilën po diskuton Lajçaku”, ka thënë ai.
Dy ditë më parë nga Brukseli kanë theksuar se për dinarin po diskutohet një zgjidhje e përkohshme, ndërkohë që tashmë është bërë e ditur se palët do të vazhdojnë diskutimin për dinarin të hënën.
Zëdhënësi i BE’së Peter Stano i ka thënë Gazetës Express të mërkurën se aty do të diskutohen propozimet që palët kanë afat t’i dërgojnë deri sonte në ora 00:00.
Stano ka thënë se Bislimi dhe Petkoviq kishin diskutuar edhe “çështje të tjera në lidhje me dialogun, duke përfshirë gjetjen e zgjidhjeve për qytetarët e prekur nga vendimi i fundit i Bankës Qendrore të Kosovës për operacionet me para të gatshme në vazhdim të takimit teknik të 27 shkurtit”.
“Takimi ishte i rëndësishëm për të vërtetuar fakte dhe për të sqaruar pyetjet e hapura. Palët ranë dakord të vazhdojnë diskutimet për këtë çështje të hënën e ardhshme, më 25 mars, me qëllim që të diskutohen propozimet konkrete për të gjetur një zgjidhje afatshkurtër të dakorduar”, kishte thënë Stano.
