Në seancën e fundit, Kuvendi Komunal i Vushtrrisë kishte miratuar propozimet për dhënien e disa pronave në shfrytëzim afatgjatë. Bëhet fjalë për disa prona komunale në qytet te Ura e Gurit dhe në Stanoc të Poshtëm. Këtë vendim të marrë nga asamblistët e kishte kthyer në rivendosje MAPL.
Disa biznese individuale që operojnë në pronën publike afër Urës së Gurit dhe Këshilli i Fshatit Stanoc i Poshtëm paraqiten kërkesën për ndalimin e dhënies në shfrytëzim të parcelave publike.
Sot, kryetari i Komunës së Vushtrrisë, Ferit Idrizi ka takuar përfaqësuesit e këtyre bizneseve dhe përfaqësuesit e Këshillit të Fshatit Stanoc i Poshtëm, ku ai mbështeti kërkesat e tyre dhe u zotua para tyre që në seancën e ardhshme të Kuvendit Komunal do t’i propozoj Kuvendit që të ndalet procedimi i mëtejmë i dhënies në shfrytëzim afatgjatë i të gjitha pronave të propozuar nga Komisioni i Kuvendit Komunal.
Postimi i Ferit Idrizi:
MBËSHTESIM KËRKESAT E QYTETARËVE DHE BIZNESEVE
Sot prita në takim Këshillin e Fshatit Stanoc i Poshtëm dhe përfaqësuesit e bizneseve që shfrytëzojnë pronat publike në Vushtrri.
Këshilli i Fshatit Stanoc i Poshtëm paraqiti kërkesën për ndalimin e dhënies në shfrytëzim të parcelave publike në këtë lokalitet, duke argumentuar se kanë në plan realizimin e projekteve me interes publik, të mbështetura nga donatorë të jashtëm.
Ndërkohë, përfaqësuesit e bizneseve që aktualisht operojnë pranë Urës së Gurit kërkuan të mos procedohet me dhënien në shfrytëzim të kësaj parcele, deri sa të gjendet një zgjidhje e qëndrueshme për aktivitetet e tyre.
Palëve ju premtova se do t’i mbështes kërkesat e tyre, dhe në seancën e radhës (që do të mbahet të enjten, datë 26.12.2024), do t’i propozoj Kuvendit që të ndalet procedimi i mëtejmë i dhënies në shfrytëzim afatgjatë i të gjitha pronave të propozuar nga Komisioni i Kuvendit Komunal.
