Kryeministri i vendit, Albin Kurti, pas takimit që zhvilloi sot në mëngjes me emisarin e Bashkimit Evropian për dialogun Kosovë–Serbi, Peter Sorensen, deklaroi se zbatimi i ligjeve për të huajt dhe për automjetet do të realizohet në koordinim të ngushtë me emisarin evropian dhe me përfaqësuesit e serbëve lokalë.
Kurti theksoi se qëllimi përfundimtar i procesit të inkorporimit nuk është kufizimi i ndonjë të drejte, por përforcimi i tyre.
Kurti, në një konferencë të përbashkët për media, u shpreh se asnjë qytetar i Kosovës nuk ka arsye të ketë frikë nga ky proces, përkundrazi duhet të përfitojë nga mundësitë dhe benefitet që ai sjell.
Ai bëri të ditur se i gjithë procesi do të zhvillohet në koordinim të vazhdueshëm me Përfaqësuesin e Posaçëm të Bashkimit Evropian për dialog, si dhe në bashkëpunim me komunitetin serb lokalë.
“Qëllimi final i inkorporimit nuk është zvogëlim i cilësdo të drejtë, por fuqizim i tyre. Rrjedhimisht asnjë qytetar i Kosovës nuk e ka arsyen më të vogël që t’i druhet këtij inkorporimi, por t’i gëzohet benefiteve nga i gjithë ky proces. I gjithë ky proces do të bëhet në koordinim të ngushtë me Përfaqësuesin Special të BE-së për dialog, por edhe në koordinim të vazhdueshëm me serbët lokalë. Për ne është me rëndësi që gjatë legalizimit, qytetarët serbë të besojnë në përfitimiet nga procesi dhe detyrimet që burojnë nga marrëveshjet e Brukselit dhe korniza ligjore e Kosovës”, tha Kurti.
Kurti theksoi gjithashtu se Qeveria do të kujdeset që gjatë këtij procesi të mos ketë pengesa në ofrimin e shërbimeve bazike, veçanërisht në arsim dhe shëndetësi. Në këtë kuadër, institucionet do të nisin procesin e integrimit të sistemit arsimor dhe atij shëndetësor brenda kornizës ligjore të vendit.
Sipas Kurtit, autoritetet lokale do t’i dorëzojnë Qeverisë listat e stafit akademik dhe shëndetësor që aktualisht janë të angazhuar në ofrimin e këtyre shërbimeve. Këto lista do të shërbejnë si bazë për dhënien e lejeve të përkohshme të qëndrimit për qytetarët e huaj që aplikojnë në Ministrinë e Punëve të Brendshme.
“Duke u siguruar që nuk vjen deri te pengesat në ofrimin e shërbimeve bazike në arsim e shëndetësi, Qeveria do të fillojë me inkorporimin e sistemit arsimor dhe shëndetësor brenda kornizës ligjore të vendit tonë. Qeveria do të pajiset nga krerët lokalë me listat e stafit akademik dhe shëndetësor që janë të angazhuar në ofrimin e këtyre shërbimeve, lista këto që do të shërbejnë si bazë për dhënien e lejeve të qëndrimit të përkohshme për qytetarët e huaj që aplikojnë në MBB”, u shpreh Kurti.
