Gjykata Kushtetuese ka bërë të ditur se më 7 gusht, gjyqtari Radomir Laban – për të cilin presidentja Vjosa Osmani kishte thënë se përbën rrezik për rendin kushtetues të vendit – kishte kërkuar të përjashtohej nga vendimmarrja në rastet që lidhen me bllokadën në Kuvend.
Kushtetuesja u shpreh se kërkesa e tij iu refuzua njëzëri.
“Më 7 gusht 2025, gjyqtari Radomir Laban kërkoi përjashtimin e tij nga vendimmarrja nga rastet KO193/25 dhe KO196/25 si dhe KO215/25. Të njëjtën ditë, Gjykata njëzëri, refuzoi kërkesën për përjashtim të gjyqtarit Radomir Laban”, thuhet në aktgjykimin e Kushtetueses.
Reagimet për shkarkimin e Labanit, kishin ardhur pas konferencës së presidentes Vjosa Osmani, e cila të martën tërhoqi një kërkesë që e kishte drejtuar në korrik Gjykatës Kushtetuese, për të kërkuar sqarim se çfarë do të ndodhte nëse Kuvendi i Kosovës nuk do të konstituohej deri më 26 korrik – afati i përcaktuar më herët nga gjykata përmes një aktgjykimi.
Osmani është shprehur se arsyeja e tërheqjes së kërkesës së saj është gjyqtari serb në Gjykatën Kushtetuese, Radomir Llaban.
Ndërkaq, pas vendimit të Kushtetueses lidhur me konstituimin e Kuvendit të Kosovës, ministrja në detyrë e Drejtësisë, Albulena Haxhiu, thirri konferencë të dielën prej ku deklaroi se gjyqtari i Gjykatës Kushtetuese nga radhët e komunitetit serb, Radomir Laban, dyshohet se është agjent i Agjencisë për Siguri dhe Informim të Serbisë (BIA).
“Serbia vazhdon të përdorë agjenturën me qëllim që të shtrijë ndikimin në çdo vend fqinj. Në mesin e këtyre shembujve është edhe ai anëtarit të Gjykatës Kushtetuese, i cili në bazë të informacioneve të institucioneve relevante të sigurisë, dyshohet se është një prej bashkëpunëtorëve të BIA-s”, ishte deklarata e Haxhiut, të dielën.
Labani, sipas saj, ishte arrestuar sa ishte zyrtar për inteligjencë në Doganën e Serbisë në vitin 2006, kur edhe u komprometua nga BIA dhe u zhvendos në Kosovë. Gjithashtu, ajo ka vlerësuar se Labani ka raporte të mira edhe me kryebanditin serb, Milan Radoiçiç, përgjegjës për sulmin e armatosur në Banjskë/Zveçan më 2023.
Shkarkimin e një gjykatësi të kushtetueses e bën presidenti i Kosovës. Por, propozimi për shkarkimin e tij paraprakisht duhet të bëhet nga dy e treta e gjyqtarëve të kushtetueses – që ka gjithsej nëntë gjykatës – dhe kjo kërkesë t’i dërgohet presidencës, në bazë të procedurave që janë të përcaktuara në Kushtetutën e Kosovës.
