Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin institucioni privat shëndetësor “Poliklinika Echo Dent”, Ambulancë e Stomatologjisë – Kabinet për Radiologji-Stomatologji është gjobitur me 8 mijë euro për shkelje të Ligjit për Shëndetësi.
Inspektorët Shëndetësorë gjatë një inspektimi të kryer më 23 mars në “Poliklinika Echo Dent”, kanë konstatuar shkelje të shumta, duke filluar nga:
- veprimtaria me licencë të skaduar prej vitit 2022 e themeluesit të saj, Dr. Hysni Gërguri,
- puna pa licencë e teknikut të radiologjisë, Naim Cimili, pasi që edhe këtij i kishte skaduar licenca në vitin 2023,
- puna pa licencë e infermierit, Petrit Gashi, të cilit i kishte skaduar licenca në vitin 2023,
- puna pa licencë e Dr. Agron Gërguri, të cilit i kishte skaduar në vitin 2023,
- puna pa licencim në DLA/MSh e Dr. Faton Gërguri – specialist i protetikës stomatologjike, i cili nuk ishte i lajmëruar si personel në këtë institucion privat shëndetësor,
- puna pa licencim në DLA/MSh e Dr. Elda Filaj Gërguri – doktor i stomatologjisë, e cila nuk ishte i lajmëruar si personel në këtë institucion privat shëndetësor,
- puna pa licencë e infermieres, Valbonë Haliti Gashi, të cilës i kishte skaduar licenca në vitin 2023,
- puna pa licencë e infermierit, Abedin Maxhuni, të cilit në DLA/MSh i kishte skaduar licenca në vitin 2023.
Gjetjet e shkeljeve ligjore nga inspektorët shëndetësorë në “Poliklinika Echo Dent”, kanë vazhduar edhe gjatë inspektimit në bodrumin e institucionit, ku është konstatuar se pa licencë nga Divizioni për Licencim dhe Akreditim i Ministrisë së Shëndetësisë ofroheshin shërbime estetike. Aty gjithashtu janë gjetur pajisje dhe aparatura përcjellëse, inventar, material të nevojshëm si dhe material shpenzues, për të cilën institucioni privat shëndetësor “Poliklinika Echo Dent”, Ambulancë e Stomatologjisë, Kabinet për Radiologji-Stomatologji, në Prishtinë, nuk posedonte licencë nga DLA/MSh, për ushtrim si veprimtari.
“Në dhomën ku ofrohej shërbimi estetik u gjetën shtrati për aplikimin e trajtimeve të ndryshme estetike, centrifuga laboratorike për PRP, Dr.pen Auto Microneedle System, LED Beauty Mask, pako të shumta me shiringa të pa përdorura, epruveta të pa përdorura për PRP, peçeta dhe vatë pambuku për pastrim, pako me dorëza jo sterile njëpërdorimëshe, lidhësja e Esmarkut, maska të ndryshme për fytyrë (24k Gold Facial, Israel’s Deep Sea Mineral Mud), brusha për shpërndarjen e maskave, Pasqyrë Lemon Bottle, After cream (krëm qetësues pas procedurave kirurgjike), shishe të Alkool-it 11, dezinfektues dhe material shpenzues”, thuhet në arsyetimin e vendimit për gjobitjen e “Poliklinika Echo Dent” të siguruar nga Veriu.info.
Në vendim bëhet se ditur se gjatë inspektimit në njërën nga shportat e mbeturinave të “Poliklinika Echo Dent” mes të tjerave janë gjetur edhe disa palë dorëza të përdorura njëpërdorimëshe, në mesin e të cilave kishte edhe dorëza me gjak, 2 shiringa me gjak të freskët, 2 shiringa me plazmë, 2 epruveta me gjak të freskët, peçeta dhe vata pambuku për pastrim të grimit të përdorura.
“Gjatë inspektimit në hapësirat e këtij institucioni, konstatuam se në këtë institucion është ushtruar veprimtari estetike, në kundërshtim me Nenin 42, paragrafi 1, të Ligjit Nr. 04/L-125 për Shëndetësi. Inspektorati Shëndetësor konstatoi se veprimtaria estetike, e ofruar në institucionin privat shëndetësor “Poliklinika Echo Dent”, Ambulancë e Stomatologjisë, Kabinet për Radiologji-Stomatologji, në Prishtinë, nuk është evidentuar në regjistër të pacientëve sipas Udhëzimit Administrativ Nr. 02/2010 për Dokumentet Shëndetësore, as në databazë elektronike të të dhënave, në kundërshtim me Nenin 52, paragrafi 2, nën paragrafi 2.1 dhe 2.2, të Ligjit Nr. 04/L-125 për Shëndetësi”, thuhet në vendimin e Inspektoratit Shëndetësor të siguruar nga Veriu.info.
Në fund të inspektimit, Inspektorati Shëndetësor i Republikës së Kosovës, ka ndaluar ushtrimin e veprimtarisë shëndetësore në hapësirën e dhomës ku ofrohej shërbimi estetik, në kuadër të institucionit privat shëndetësor “Poliklinika Echo Dent”.
Veriu.info ka tentuar të marrë një qëndrim nga “Poliklinika Echo Dent” për këtë vendim të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
LEXONI EDHE:
