Kryetari i Nismës Socialdemokrate, Fatmir Limaj, ka uruar Shtetet e Bashkuara të Amerikës me rastin e Ditës së Pavarësisë, duke i cilësuar si mik të përjetshëm dhe partner strategjik të Kosovës.
Ai vlerësoi rolin vendimtar të SHBA-së në çlirimin, pavarësinë dhe shtetndërtimin e Kosovës, duke theksuar se aleanca me Amerikën mbetet thelbësore për sigurinë, zhvillimin dhe rrugëtimin euro-atlantik të vendit.
Postimi i plotë:Mik i përjetshëm e partner strategjik, Urime Ditën e Pavarësisë 🇺🇸!
Në këtë ditë të rëndësishme për popullin amerikan, shpreh urimet dhe mirënjohjen time më të thellë për SHBA-të, mikun tonë të përhershëm dhe partnerin tonë strategjik.Roli i SHBA-së në historinë moderne të Kosovës është i pazëvendësueshëm. Në ditët më të vështira të luftës sonë çlirimtare, SHBA qëndroi përkrah popullit të Kosovës, duke mbështetur të drejtën tonë për liri. Në shpalljen dhe njohjen e pavarësisë, mbështetja amerikane ishte vendimtare. Në shtetndërtim dhe forcimin e institucioneve demokratike, SHBA ka qenë udhërrëfyes i çmuar dhe garantues i stabilitetit.
Miqësia dhe partneriteti strategjik me SHBA-në nuk janë vetëm trashëgimi historike, por udhërrëfyes për të ardhmen. Kosova ka nevojë për këtë aleancë të fortë, për sigurinë, zhvillimin dhe orientimin e saj euro-atlantik. Kjo nënkupton bashkëpunim të ndërsjellë, mirëkuptim të thellë dhe respektim të drejtimit që Shtetet e Bashkuara ofrojnë për paqen dhe stabilitetin në rajon.
