Kreu i Nismës, Fatmir Limaj, ka reaguar pas aktgjykimit të Dhomave të Specializuara në Hagë ndaj ish-krerëve të UÇK-së.
Limaj e ka cilësuar vendimin si të padrejtë, të papranueshëm dhe të pamerituar, duke thënë se lajmi nga Haga ka qenë i rëndë për të gjithë.
Ai u ka bërë thirrje qytetarëve që zhgënjimin dhe dëshpërimin pas këtij vendimi të mos lejojnë të keqpërdoren, por t’i shndërrojnë në forcë dhe bashkim.
“Mos të lejojmë që mërzinë tonë, zhgënjimin tonë, dëshpërimin tonë ta keqpërdorë askush kundër vendit tonë, por le ta kthejmë në një forcë e bashkim për të vazhduar drejt betejave të ardhshme, një fitore të plotë”, ka thënë Limaj.
Ai ka bërë thirrje për unitet pas vendimit të Gjykatës Speciale, duke theksuar se, sipas tij, beteja për drejtësi duhet të vazhdojë.
