Komuna e Lipjanit e ka shpërblyer me tender në vlerë prej mbi 6 milionë euro grupin e operatorëve ekonomik LINDA, Euro Infrastruktura dhe B-Bardhi Sh.P.K. për ndërtimi i nënkalimit, vazhdimin e ndërtimit të sheshit, ndërtimi i parkut qendror të qytetit dhe parkingut nëntoksor në Lipjan, raporton Veriu.info.
Në tenderin e shpallur në muajin korrik kishin ofertuar katër kompani, ku grupi i operatorëve ekonomik Olti Trasing Sh.P.K., Rexha Sh.P.K. dhe Konstruktori Ing 1969 Sh.P.K. kishin ofertuar me çmimin më të lirë prej 6,022,220 euro, por që janë eliminuar nga autoriteti kontraktues, përkatësisht zyra e prokurimit e komunës së Lipjanit.
Në arsyetimin e eleminimit ndër të tjera, thuhet se deklarata nën betim e konzorciumit Rexha Sh.P.K. nuk i përket projektit në fjalë dhe është bërë para datës së publikimit të këtij projekti, por po ashtu përmendet edhe arsye që kanë të bëjnë me stafin e angazhuar, siç edhe mund t’i shihni në dokumentin e mëposhtëm:
Si ofertuesi më i lirë i përgjegjshëm ka dalë grupi i operatorëve LINDA, Euro Infrastruktura dhe B-Bardhi Sh.P.K., të cilët kanë ofertuar me çmim prej 6,127,777.77 euro, duke fituar kështu tenderin për ndërtimin e një nënkalimi, vazhdimin e ndërtimit të sheshit, ndërtimin e parkut qendror të qytetit dhe parkingut nëntoksor në Lipjan.
Veriu.info ka hulumtuar për kompanitë LINDA dhe Euro Infrastruktura, ku nga të dhënat që gjenden në Agjencinë e Regjistrimit të Bizneseve shihet se të dy kompanitë kanë pronarin e njëjtë, Hysri Berishën, i cili është pronar me 100% të aksioneve në to.
Pra, teknikisht Hysri Beridha më kompaninë LINDA si lidere e operatori ekonomik fitues, ka bërë konzorcium me “vetveten” për të arritur të shpallet fitues i tenderit prej mbi 6 milionë euro, pasi që në dy kompanitë përveç pronar i 100% të aksioneve, është edhe drejtor menaxhues.
Ani pse kanë fituar tender mbi 6 milionë euro, Veriu.info ka zbuluar se dy kompanitë kanë një kapital themelues prej 5,500 euro, LINDA 3,000 dhe Euro Infrastruktura 2,500, përderisa numrin e punëtorëve këto kompani së bashku e kanë 28. Ndërsa, kompania B-Bardhi ka të evidentuar vetëm 2 punëtorë dhe ka kapital themelues prej 20,000 euro.
Veriu.info ka siguruar edhe kontratën mes komunës (autoritetit kontraktues) dhe operatorit ekonomik është nënshkruar më 19 shtator 2013, ku afati i kryerjes së punëve është 300 ditë, sipas dosjes së tenderit.
Ndryshe, Hysri Berisha është djali i biznesmenit Milaim Berisha, për të cilin raportohej në vitin 2016 se si edhe duke qenë në burg ai, kompania e tij kishte fituar mbi 1 milionë euro tenderë publik. Madje, në hulumtimin e publikuar nga InsaInsajderi dhe organizata jo-qeveritare Democracy Plus ai përshkruhej si “El Chapo Kosovar”, duke qenë se i ecte biznesi përkundër që gjendej prapa grilave. (https://insajderi.com/hulumtime/el-chapo-kosovar-qe-arriti-te-perfitoje-mbi-1-milion-euro-nga-tenderet-publike/)
