Analisti politik Shkëlzen Maliqi, për FrontOnline ka komentuar zhvillimet e fundit politike në vend, duke vlerësuar se situata aktuale po çon drejt zgjedhjeve të reja dhe se skenari aktual është i parashikuar.
“Unë po e shoh si skenar si të parashikuar, të njëjtin skenar që me zgjatë. Kurti asnjëherë s’ka qenë i sinqertë në këto raporte dhe me sa kuptoj ai po do me marrë edhe Presidencën, me provu me marrë dhe po dëshiron të shkojë në zgjedhje”, ka deklaruar Maliqi për FrontOnline.
Sipas tij, Lidhja Demokratike e Kosovës po përballet me vështirësi në marrjen e vendimeve, për shkak të zhvillimeve të brendshme.
“LDK-ja e ka të vështirë me vendos pasi ka edhe përbrenda përçarje të re dhe s’kanë mundur me u kënaq me disa poste që i janë ofru dhe kjo pa shmangshëm tregon se po shkohet zgjedhje”, është shprehur ai.
Maliqi ka theksuar se kryeministrit Albin Kurti i mungon kontrolli i plotë institucional, duke përmendur edhe rëndësinë e postit të presidentit.
“Kurti i mungon kontrolli i plotë, edhe pse Presidenti është figurë simbolike por i ka disa nënshkrime të rëndësishme. Kemi edhe disa ditë, kur kalon afati dhe me automatizëm shkojmë në zgjedhje”, ka thënë Maliqi për FrontOnline.
Ai ka folur edhe për ndikimin e elektoratit dhe votës së diasporës në zgjedhjet e mundshme.
“S’kam bërë hulumtime, por është një përqindje e elektoratit që po lëvizë, nuk është konstante, varet nga rrethanat, vota e diasporës ka qenë vendimtare dhe nëse mbahen zgjedhjet në qershor, s’do ketë vend për 51% por sa do jetë mbetet e paqartë, varet edhe nga votat që Osmani do ia merr VV-së. Mundet me qenë rënie, do jetë test për Kurtin dhe VV-në”, ka deklaruar ai.
