Mbi 180 mijë prindër apo kujdestarë kanë aplikuar përmes platformës e-kosova për subvencionim të teksteve shkollore.
Sipas ministres së Arsimit, Arbërie Nagavci deri tani janë realizuar mbi 70% të pagesave apo më shumë se 9 milionë euro.
Me blerjen e teksteve, kanë nisur edhe pakënaqësitë e prindërve.
Disa janë ankuar se është e pamjaftueshme shuma e ndarë për këtë qëllim, e disa të tjerë për rritjen e çmimit të librave nga shtëpitë botuese.
Në adresë të portalit Front Online, kanë arritur disa ankesa përcjellë me video dhe fotografi ku shihet se janë vendosur çmime më të larta mbi çmimin që është në libër.
Këto video i kanë dokumentuara ankuesit edhe me faturën ku librat në fjalë shihet se janë blerë në shtëpinë botuese “Dukagjini”.
Front Online ka dërguar pyetje në adresë të “Dukagjinit”, por deri në publikimin e tekstit ata nuk kanë kthyer përgjigje.
Të njëjtit janë kontaktuar edhe përmes telefonit, por nuk i janë përgjigjur thirrjeve telefonike.
Front Online lidhur me këtë çështje dhe shqetësimet e ngritura nga qytetarët, ka dërguar pyetje edhe në Ministrinë e Arsimit, po as nga kjo ministri nuk janë përgjigjur.
Përmes telefonit këshilltari i ministres Nagavci, Muhedin Nushi, ka udhëzuar që pyetjet t’u dërgohen në mënyrë elektronike zyrës për medie të kësaj ministrie.
Nga ana tjetër njohës të fushës së arsimit dhe deputetë konsiderojnë se mënyra më e mirë do të ishte shpërndarja e teksteve shkollore drejtpërdrejtë nga Ministria, sepse sipas tyre, vetëm në këtë formë nuk do të paraqiteshin problemet.
Ish-zëvendësministri i Arsimit : Përfshirja e librarive në shpërndarjen e teksteve shkollore rrit koston e librave
Ish-zëvendësministri i Arsimit, Xhavit Rexhaj, ka komentuar shtrenjtimin e librave të këtij viti të ri shkollor duke thënë se Ministria e Arsimit do të duhej të siguronte dërgimin e teksteve përmes shtëpive botuese direkt në shkolla, pa shtuar hallka të tjera si prindërit, libraritë apo transferet e ndryshme.
‘’Gjithsesi ma mirë ka qenë që ministria e Arsimit të sigurojë që përmes shtëpive botuese tekstet të shkojnë në shkollë pa i shtuar hallkat siç janë prindërit, libraritë , transferet e hallkat të tjera’’, tha ish ministri Rexhaj për FrontOnline.
Sipas tij, përfshirja e librarive në këtë proces ndikon në rritjen e çmimit të librave, pasi këto subjekte duhet të shtojnë stokun, depoja dhe stafin, sidomos në periudhën e regjistrimeve.
“Normal që kjo reflektohet në çmim, prandaj konsideroj që shtimi i hallkave në procesin e shpërndarjes në këtë rast i librarive është shpenzim shtesë, që çon në rritjen e çmimit të librave”, ka thënë Rexhaj për Front Online.
Ai shtoi se rritja e çmimit prej 0,50 cent nuk është shumë e lartë, por megjithatë angazhimi i librarive në këtë proces do të ndikojë në çmime edhe më të larta
‘’Me thënë të drejtën çmimi 0,50 cent që është rrit nuk është shumë i lartë dhe mendoj që angazhimi i librarive në këtë proces do të reflektojë edhe në çmime më të larta’’, tha Rexhaj.
Kadrijaj: Ministria është dashur vetë t’i blejë librat dhe ta negociojë çmimin, jo të shkaktoj telashe
Deputetja e AAK-së, Time Kadrijaj, ka kritikuar mënyrën se si Ministria e Arsimit ka menaxhuar sigurimin e librave shkollorë, duke thënë se procesi aktual ka krijuar probleme në furnizim dhe ka shtrenjtuar librat.
“Mendoj që forma më praktike e librave ka qenë kur vetë ministria dhe shkollat i kanë blerë librat, dhe nxënësit i kanë marrë direkt. Ministria është dashur të negociojnë me çmime ,se si do te jetë çmimi i librave sepse me shumicë normal kur merren janë më lirë’’, ka thënë Kadrijaj.
Ajo shtoi se qëllimi i ministrisë për të dëmtuar një kompani në këtë proces po rezulton në dëmtim të buxhetit të shtetit.
‘’Ministria duke dashur të dëmtojë një kompani në fakt po e dëmton buxhetin e shtetit gjë që nuk është e mirë sepse po shohim që ka telashe të mëdha në sigurimin e teksteve shkollore’’, deklaroi Kadrijaj për FrontOnline.
