Gazetari Ilir Mirena përmes një pyetjeje ka zgjedhur t’i komentojë zhvillimet e fundit në Maqedoninë e Veriut, ku VMRO-DPMNE, partia maqedonase e Hristjan Mickoskit po dëshiron ta marrë në Qeveri opozitën shqiptare – koalicionin e njohur me akronimin VLEN, pas zgjedhjeve parlamentare që do të mbahen atje.
“E qysh ka mundesi, VLEN’i nga preheri i Albin Kurtit me perfundu ne gjirin e Hristijan Mickovskit?…”, shkroi Mirena në Facebook.
Koalicionin e ardhshëm qeveritar do ta udhëheqë VMRO-DPMNE me koalicionin VLEN, tha Hristijan Mickoski së fundmi, duke iu përgjigjur kryetarit të BDI-së, Ali Ahmetit i cili bëri thirrje që të respektohet vullneti i qytetarëve dhe se pret që partia më e madhe e shqiptarëve në Maqedoninë e Veriut të marrë ftesë për t’u futur në Qeverinë e ardhshme.
Më 8 maj mbahen zgjedhjet parlamentare në RMV dhe VMRO-DPMNE është partia favorite për t’i fituar ato. Të njëjtën ditë mbahet edhe rundi i dytë i zgjedhjeve presidenciale ku për shef të shtetit do të garojnë kandidatja e VMRO DPMNE, Gordana Siljanovska- Davkova, e cila priu bindshëm në rundin e parë, dhe presidenti aktual, kandidati i LSDM-së, Stevo Pendarovski, i renditur i dyti.
Në rundin e parë të zgjedhjeve presidenciale, ministri shqiptar i Punëve të Jashtme i Maqedonisë së Veriut, Bujar Osmani, kandidat për president nga koalicioni Fronti Europian i udhëhequr nga BDI-ja, mori rreth 40 mijë vota më shumë sesa kundërkandidati i tij, Arben Taravari nga koalicioni i partive opozitare shqiptare, i mbështetur edhe nga Lëvizja Vetëvendosje që qeveris në Kosovë.
