Fushatat zgjedhore shpesh dinë t’i ekzaltojnë kandidatët për deputet, duke dhënë deklarata të pamatura dhe fyese ndaj partive kundërshtare. Por të rralla janë rastet kur kandidatët për deputet fyejnë figurat kryesore të partisë së tyre.
Një veprim të tillë e ka bërë kandidati për deputet nga radhët e PDK-së, Artan Behrami, i cili në një deklaratë publike në një televizion ka thënë që qytetarët e Mitrovicës për herë të parë i kanë kandidatët e mirë, shkruan Veriu.info
“Do të jem një zë i fuqishëm i Mitrovicës edhe i ‘luginës së Ibrit’ prej nga unë vijë, sepse imazhi i Mitrovicës për një kohë të gjatë ka qenë i zymtë. Dhe kur e kujtojmë Mitrovicën tonë e cila ka qenë epiqendër e kulturës, epiqendër e dijes, epiqendër e emancipimit, unë mendoj që na duhet me ia kthy dinjitetin edhe qytetarit të Mitrovicës dhe qytetarët e Mitrovicës për herë të parë e kanë kandidatët e mirë dhe do të ndihen të përfaqësum në Kuvendin e Republikës së Kosovës, sepse këta kandidatë së bashku me mua janë reflektim edhe i asaj qytetarie”, ka thënë kandidati Artan Behrami.
Kandidati Behrami duke dashur të imponohet si vlerë para qytetarëve, ka harruar se PDK e Mitrovicës ka pasur kandidatë të mirë (me vlera) ne çdo palë zgjedhje.
Kjo deklaratë e tij me zë e figurë se mitrovicasit për herë të parë kanë kandidatët të mirë, sipas përspektivës së Behramit, nënkupton që Bajram Rexhep, Kadri Veseli, Drita Kadriu, Rrustem Musa, Avni Kastrati, e shumë kandidatë të tjerë nga Mitrovica nuk kanë qenë të mirë.
Kujtojmë se doktorët Bajram Rexhepi e Rrustem ishin mjek të UÇK-së, të cilët kishin mjekuar shumë ushtarë të plagosur gjatë luftës, duke dhënë një kontribut të jashtëzakonshëm për çlirim e Kosovës. Kadri Veseli ishte njëri prej themeluesve të UÇK-së dhe njëri prej bartësve kryesore të luftës çlirimtare. Drita Kadriu është një intelektuale e shquar e Mitrovicës dhe nënshkruese e Deklaratës së Pavarësisë së Kosovës si deputete. Doktor Avdyl Salihu është njëri prej profesionistëve mjekësor më me namë dhe intelektual i shquar i Mitrovicës. Avni Kastrati është po ashtu njëri prej intelektualëve më të shquar të Mitrovicës. Pra, të gjithë të lartëcekurit ishin kandidatë për deputet nga Mitrovica./Veriu.info
