Mospajtimet mes komunave dhe Ministrit të Financave, Punës dhe Transfereve, Hekuran Muratit, s’kanë mbarim. Përplasjet që filluan për mjetet vetanake të komunave, po vazhdojnë lidhur me Ligjin për Tatimin në Pronë, me të cilin komunat obligoheshin t’iu falin qytetarëve tatimin deri në vlerën 100 euro. Gjykata Kushtetuese ka pezulluar Nenin që parasheh ketë, duke vendosur masë të përkohshme deri më 30 nëntor, kur praktikisht veçse përfundon afati për pagesën e këstit të dytë.
Gjykata Kushtetuese ka pezulluar dje zbatimin e nenit 5 të Ligjit të ndryshuar për tatimin në pronë, i cili parashihte faljen e tatimit deri në 100 euro për qytetarët nga ana e komunave.
“Gjykata, njëzëri, ka vendosur që (i) kërkesa për vendosjen e masës së përkohshme lidhur me aktin e lartcekur të miratohet në kohëzgjatje deri më 30 nëntor 2023; dhe për pasojë (ii) të pezullohet menjëherë zbatimi i nenit 5 të Ligjit Nr.08/L-224 për Ndryshimin dhe Plotësimin e Ligjit Nr. 06/L-005 për Tatimin në Pronën e Paluajtshme dhe zbatimi i vendimeve të nxjerra në bazë të këtij neni deri në afatin e lartcekur”, thuhet në njoftim e lëshuar nga Kushtetuesja.
Sipas këtij ligji, parashihej që “vendimi për faljen e tatimit në prone merret nga kuvendi komunal i çdo komune më së largu 30 ditë nga hyrja në fuqi e këtij ligji”. Ky ligj ka hyrë në fuqi më 14 gusht.
Nga Asociacioni i Komunave të Kosovës e kanë mirëpritur vendimin e Kushtetueses dhe besojnë se edhe vendimi final do të jetë në favor të komunave.
“Ne si Asociacion i Komunave të Kosovës gjithmonë i kemi besuar vendimeve të Gjykatës Kushtetuese dhe ndarjes së drejtësisë. Kemi qenë të bindur se ky vendim do të jetë pro komunave, e kemi mirëpritur këtë vendim dhe besojmë që edhe vendimi final do të jetë pro komunave, se përndryshe komunat do të humbin rreth 30 milionë euro”, tha Ibrahimi.
Pas vendimit të Kushtetueses, ka reaguar edhe Ministri i Financave, Punës dhe Transfereve, Hekuran Murati.
Murati ka thënë se “garda e vjetër”, duke aluduar për opozitën, po fshihen pas Gjykatës Kushtetuese.
“Masa e pezullimit është vendosur deri më 30 nëntor, mjaftueshëm sa për të qenë më vonë se afati i fundit për pagesën e këstit të dytë të tatimit në pronë, që është me 30 shtator.
Pra po del ajo që pata paralajmëruar për gardën e vjetër, se qëllimin e kanë që të fshihen prapa Gjykatës Kushtetuese, se gjoja ata “do ta kishin miratuar zbritjen e tatimit, por ja që ligji është bllokuar në Gjykatë Kushtetuese””, ka shkruar Murati.
Kjo s’është hera e parë që Murati ka përplasje me komunat në vend. Para disa muajve, mollë sherri ishin bërë mjetet vetanake të komumave. Me Ligjin mbi Ndarjet Buxhetore, Murati ua kishte bllokuar komunave mjeteve vetanake.
Shuma e mjeteve vetanake që ishin bllokuar ishte 37.5 milionë euro. Zhbllokimi i këtyre mjeteve ishte bërë tek pasi Lidhja Demokratike e Kosovës kishte kushtëzuar Qeverinë për to, me votimin e marrëveshjeve ndërkombëtare.
Pas kësaj, Qeveria kishte inicuar ndryshimin e Ligjit mbi Ndarjet Buxhetore.
Qeveria Kurti kishte planifikuar që t’ua marrë komunave mjetet vetanake të pashpenzuara nga vitet paraprake, përmes Projektligjit mbi Ndarjet Buxhetore për vitin 2023.
Për këtë çështje kishte alarmuar fillimisht kryetari i komunës së Prishtinës, Përparim Rama, në rastin e të cilit bëhej fjalë për 38 milionë euro.
Ai e kishte kundërshtuar fuqishëm fjalinë e paragrafit 6 të Nenit 9 të Projekt-buxhetit për vitin 2023, ku thuhet se “Të gjitha të hyrat vetanake të mbledhura para vitit fiskal 2022 dhe të pashpenzuara, bëhen pjesëe Fondit të Kosovës në bilancin bankar”.
Kjo fjali ishte fshirë pastaj përmes një amandamenti të propozuar nga Lidhja Demokratike e Kosovës.
Kjo parti kishte paralajmëruar se do ta dërgonte Ligjin në Gjykatën Kushtetuese, nëse s’do të votohej amandamenti. Edhe pse ky amandament ishte kundërshtuar nga Ministri Murati, pro tij kishin votuar edhe deputetët e partisë në pushtet.
