Genc Metaj, vëllai i deputetes së Lëvizjes Vetëvendosje, Shqipe Metaj është emëruar Drejtor Ekzekutiv në Agjencinë për Menaxhimin e Emergjencave. Emërimi i tij në këtë pozitë është bërë publik në mbledhjen elektronike që ka mbajtur Qeveria e Kosovës të hënën.
“Emëruar z. Genc Metaj në pozitën e Drejtorit Ekzekutiv në Agjencinë për Menaxhimin e Emergjencave”, thuhet në njoftim.
Për këtë pozitë kishte një garë të ashpër pasi që lidhur me procesin e testimeve ku printe vëllai i deputetes së VV’së janë adresuar tri ankesa në KPMSHC. Por, Këshilli Mbikëqyrës Civil i ka hedhur poshtë ankesat si të pabaza.
Emërimi i tij në këtë pozitë ishte paraparë edhe më herët. Mediat kishin raportuar se si vëllai i deputetes po i printe listave të testimit.
Në garë të ngushtë ishte me Kastriot Lajqin. Por, sipas dokumentit të publikuar, Mataj kryesonte me pikët.
Metaj nga testi me gojë dhe me shkrim ka grumbulluar 88 pikë, për dallim nga 73.4 që ka marrë Kastriot Lajqi.
Në total, për këtë pozitë kishin qenë gjashtë kandidatë.
Kandidatët tjerë që nuk janë përzgjedhur, sipas personelit të MPB’së, nuk e kanë kaluar kriterin e njohjes së Gjukes Angleze, niveri B2.
Kujtojmë se në këtë pozitë ka qenë Fadil Kodra, i cili u largua nga kjo pozitë me një vendim të Ministrit të Punëve të Brendshme, Xhelal Sveçlës. Por, pas një beteje ligjore, Kodra e kishte fituar betejën me Ministrin Sveçla./Insajderi
