Ish-komandanti i Ushtrisë Çlirimtare të Kosovës, Nasim Haradinaj foli mbrëmë në Pressing në T7 për rolin e tij para dhe gjatë luftës.
Haradinaj njihet për luftën në Koshare, fshatin e Gjakovës në kufi me Shqipërinë. Ai përmendi ish-gjeneralin shqiptar të Divizionit të Kukësit, Kudusi Lame dhe njeriun e fortë të Tropojës atë kohë, Fatmir Haklaj për kontributin e tyre në atë betejë dhe si dy njerëzit e vetëm më të fortë sesa ai.
“Këqyre, po e heqi modestinë. Le të flet kush çka të kanë qejf, veç atë kohë veç dy njerëz janë kanë ma të fortë se unë, ose me e ngjehë edhe Zotin, dalin tre. E tu ia nisë prej Zotit edhe prej forces, po shkoj kështu: Zoti, Fatmir Haklaj edhe Kudusi Lame. Atëherë u kanë Nasim Haradinaj… Të tretë qeta e kanë ba Nasimin. Unë fuqinë e tre qetyne e kam pasë, edhe të Zotit, edhe të Fatmir Haklajt për Tropojë, edhe të Kudusi Lames”, tha Haradinaj.
“Tropoja ka qenë vend i egër. Në Tropojë të ka kushtu jeta”, kujtoi ai.
Nasim Haradinaj tha se “Fatmir Haklaj u kanë UÇK”, duke hedhur poshtë kështu disa deklarata se ai kishte bashkëpunuar me Serbinë.
Lufta e UÇK-së në Koshare, sipas Nasim Haradinajt, do të ishte e pamundur pa Fatmir Haklajn.
“Mos me pasë kanë Fatmir Haklaj aty, në gjysë të frontit të Koshares, në gjysë të frontit, tu luftu na, me na pasë dhanë urdhër ‘qetu s’du me ju pa ma’, ne i kemi pasë dy rrugë: njana u kanë që s’na e ka majtë dhe jemi mundu dy muj me mbërri te Ramushi, e tjetra u kanë me u hjekë na krejt prej Tropoje se qaty s’kishim mujtë me nejtë”.
Duke iu referuar një deklarate të mëhershme të Anton Qunit se kishte pasur një konfrontim me Fatmir Haklajt sepse ai ishte “bashkëpunëtor i Serbisë”, Haradinaj tha se “tash kur të vdesin njerëzit, njerëzit flasin gjithçka”.
“U kanë ajo deklarata e atij Anton Qunit që e kom tutë Fatmir Haklajn a di… Kam reagu. Ai nuk ish çu prej tavoline… Edhe ai e di mirë që mos me pasë kanë intervenimi im, çka ish bë atë ditë. Se Fatmir Haklaj, kur kanë dalë ushtarët manekena, me sheshira me shëtitë me kallasha në Bajram Curr, ai ka thanë ‘këtu UÇK-ja s’ka çka lypë, këtu unë e mbaj rendin, UÇK-ja e ka vendin në luftë, andej’”, tha Haradinaj.
Atë kohë, Haradinaj tha se “dezertorët” (duke iu referuar ushtarëve që kishin qenë në FARK), ia kishin shprehur atij vullnetin për t’iu bashkuar UÇK-së. Për t’i pranuar, ai tha se i pyeti Kudusi Lamen e Xhavit Halitin.
“Janë dezertorë. Janë ikë prej lufte. Janë pagu brenda. Janë ikë, e kanë lanë Ramushin… Janë ardhë këtu, e kanë pa që kanë bë gabim, shpirtin patriotik e kanë pasë – arsyen pse janë ikë e dinë ata, por kanë dezertu – dhe pastaj një vullnet me u bashku me mu”, tha ai.
“Unë i kam pyet dy njerëz çka me bë. I pari më ka thënë automatikisht po, ‘kjo është detyra më fisnike’, është Kudusi Lame, ndërsa i dyti ka qenë Jashar Salihu. I kam pyet edhe tre njerëz tjerë: Xhavit Halitin. Xhavit Halitit ju kam dhimtë mos po dal edhe unë i tradhtuar qysh e tradhtuan Ramushin. Tha ‘këqyr ke kujdes, se të thonë tani edhe tradhtar’. E thashë mu tradhtar s’un më thonë se jam djali i Smajlit, është problem me më thënë tradhtar, dhe e dyta, jam Nasimi vetë”, tha Haradinaj.
Edhe pse kishin luftuar bashkë, Haradinaj pranoi se ndjente neveri për fraksionin e FARK-ut në Koshare.
Intervistën e plotë të Nasim Haradinajt në Pressing mund ta ndiqni këtu.
