Prej muajit janar ndërmarrja publike lokale “Stacioni i Autobusëve” në Mitrovicë kishte mbetur pa kryeshef ekzekutiv, sepse tashmë ish kryeshefit Esat Jusufi i kishte skaduar mandati.
Bordi i Drejtorëve i mbetur në detyrë nga qeverisja e kaluar nuk i kishte vazhduar mandatin, raporton Veriu.info.
Qeverisja komunale që udhëhiqet nga Faton Peci para pak ditësh kishte emëruar Bordin e ri të Drejtorëve me mandat të përkohshëm, i cili ka emëruar ushtruesin e detyrës së kryeshefit.
Në mbledhjen e mbajtur sot, Bordi i Drejtorëve ka emëruar U.D. Kryeshefe të Ndërrmarrjes Lokale “Stacioni i Autobusëve”, Blerta Çelikun.
Blerta Çeliku në zgjedhjet e mbajtura në vjeshtë ishte kandidate për asambliste nga radhët e partisë GUXO.
Edhe ish kryeshefi Esat Isufi para se të zgjidhet kryeshef i kësaj ndërmarrje, ka qenë kandidat i PDK-së për deputet në Kuvendin e Kosovës.
Kujtojmë se Veriu.info kishte raportuar vazhdimisht për skandale menaxheriale në ndërmarrjen që udhëhiqej nga Esat Jusufi.
Në vitin 2023 kishim raportuar se si “Stacioni i Autobusëve” i Mitrovicës kishte shitur kundërligjshëm 10 tonë metale të kulmit të objektit përmes një procesi të manipuluar.
Edhe vitin e kaluar Veriu.info ka raportuar për një skandal tjetër, ku prona publike e “Stacioni i Autobusëve” i ishte dhënë kundërligjshëm në shfrytëzim Afrim Durmishit.
Është e paqartë se U.D. Kryeshefja e re a do të merret me sanimin e pasojave të skandaleve që u shkaktuan nga menaxhmenti i kaluar.
