Kancelari gjerman, Olaf Scholz, ligjet e reja që lehtësojnë ardhjen e fuqisë së kualifikuar punëtore në këtë vend i quajti “hap tjetër për modernizimin e Gjermanisë, për të siguruar rritjen ekonomike edhe për të ardhmen, dhe një hap tjetër që tejkalon paralizën e disa dekadave”.
Pas miratimit të ligjeve në Bundestag, më në fund hyjnë në fuqi më 1 qershor dy ndryshime ligjore që u miratuan në Gjermani vitin e kaluar.
Kontingjenti nga Ballkani Perëndimor, që vjen me rregullore të lehtësuara në Gjermani, dyfishohet
Nga 1 qershori 2024 zgjerohet Rregullorja e Ballkanit Perëndimor. Kjo rregullore u fut para disa vitesh për të lehtësuar ardhjen e fuqisë punëtore nga vendet e Ballkanit Perëndimor.
Numri i fuqisë punëtore nga Shqipëria, Kosova, Bosnje-Hercegovina, Maqedonia e Veriut, Mali i Zi, Serbia për në Gjermani do të zgjerohet tani nga 25 mijë në 50 mijë vetë në vit.
Më 1 qershor po ashtu hyn në fuqi Karta e Shanseve
Me këtë kartë të huajt nga vendet jo anëtare të BE kanë mundësi të udhëtojnë në Gjermani për të kërkuar punë, edhe pa pasur kontratë pune. Për marrjen e Kartës së Shanseve duhen mbledhur pikë: ka disa kriteret për marrjen e pikëve, aty llogaritet njohja bazë e gjuhës gjermane apo njohja e mirë e gjuhës angleze, kualifikimet, përvoja profesionale, të paktën dy vjet apo një shkollim i lartë profesional në vendin origjinë.
Për arritje të tjera të veçanta, kandidatët marrin pikë të tjera – Kush arrin 6 pikë merr lejen e qëndrimit në Gjermani për 1 vit, nëse e siguron vetë jetesën./DW
