Iu deshën 20 sezone në futbollin profesionist, por Francesco Acerbi më në fund e shënoi golin e parë në futbollin evropian dhe ky gol s’kishte mundur të arrinte në një moment më të mirë dhe më të madh se ky.
37 vjeçari u bë hero për t’ia mundësuar Interit të mbetet në lojë në minutën e 93-të kur e barazoi rezultatin në 3:3 kundër Barcelonës në ndeshjen e kthimit gjysmëfinale të Ligës së Kampionëve.
Si të ishte një sulmues me përvojë, qendërmbrojtësi italian shkoi në sulm dhe e realizoi një gol të artë pas një harkimi të Denzel Dumfries, shkruan “Gazeta Express”.
Nga ky moment, Interi mori zemër dhe më pas fitoi në vazhdime falë golit të Davide Frattesit, për ta mbyllur çështjen me rezultat të përgjithshëm, 7:6 në dy përballjet spektakolare.
Por, kush është Francesco Acerbi?
I lindur në Lombardia në vitin 1988, Francesco Acerbi e kishte nisur karrierën në klubin e njohur si Pavia, i cili aktualisht luan në divizionin e pestë të futbollit italian.
Ai e bëri debutimin në futbollin profesionist në prill të vitit 2006 duke i zhvilluar 48 ndeshje në katër vjetët pasues.
Pas një viti të kaluar në Reggina, më pas luajti në Serie B, ndërsa e siguroi transferimin në Chievo Verona përmes Genoas në vitin 2011, ku u realizua një transferim i komplikuar, i cili i përfshiu disa palë, por që në atë kohë ishte një rrugë legale.
Më pas, u transferua përkohësisht tek Milani, për ta parë veten shpejt tek Chievo.
Lëvizja tek e promovuara në Serie A, Sassuolo në vitin 2013 ishte e duhura pasi më në fund ia dha mundësinë që ta tregonte veten në Serie A.
Mirëpo, pas kancerit në testikuj, ai megjithatë i mblodhi forcat dhe e kaloi këtë sëmundje duke i bërë 13 paraqitje në ligën elitare italiane para se të ndalej përsëri me një tjetër problem me kancerin.
Ai u rikthye në fushën e blertë në sezonin 2014/15 dhe prej aty, 26 vjeçari e nisi shkëlqimin.
Ai i bëri 173 paraqitje me Sssuolon duke e bërë veten lojtar të rëndësishëm në Serie A dhe duke debutuar në Kombëtaren e Italisë, ndërsa më pas u transferua në Lazio për 12 milionë euro në vitin 2018.
Në klubin nga Roma ai ishte afër ta thyente rekordin për ndeshje të vazhdueshme të zhvilluara në ligë, vetëm 13 ndeshje nga rekordi i Javier Zanettit, me 162 lojë pa u ndalur.
Në Lazio, Acerbi e kishte fituar Kupën e Italisë në sezonin 2018/19 dhe Superkupën e Italisë në vitin 2019, ndërsa u shpall kampion i Evropës me Italinë në vitin 2021 para se të lëvizte drejt Interit në vitin 2022, fillimisht në formë huazimi, e më pas për 4 milionë euro si lëvizje e përhershme, një opsion i lirë për “Nerazzurri” duke e pasur parasysh moshën e tij 34 vjeçare në atë kohë.
Tash, ai është bërë lojtar i rëndësishëm i Zikaltërve, me të cilët e ka fituar titullin e kampionit në Itali, Kupën e Italisë dhe dy herë Superkupën e Italisë, plus një pjesëmarrje në finale të Ligës së Kampionëve në vitin 2023.
Sa gola i ka shënuar në karrierë Francesco Acerbi
Si qendërmbrojtës, Francesco Acerbi nuk ishte shumë aktiv në sulm dhe kjo është e kuptueshme.
Sidoqoftë, golin e parë në futbollin profesionist ai e kishte shënuar në shkurt të vitit 2009 për Pavian.
Më pas, iu desh të priste deri në mars të vitit 2012 për ta gjetur golin e parë në Serie A, në fanellën e Chievos.
Më së shumti gola brenda një sezoni ai i ka shënuar katër sosh, të cilën gjë e ka bërë tri herë, dy herë me Sampdorian dhe një herë më Lazion.
E tash i erdhi fundi edhe pritjes së gjatë për një gol evropian.
Në paraqitjen e tij të 66-të në kompeticione evropiane të UEFA-s, Acerbi e shënoi golin e parë mbrëmë për ta nivelizuar ndeshjen dramatike me Barcelonën në fund të minutave shtesë në ndeshjen e kthimit gjysmëfinale të Championsit.
Ky pa dyshim ishte goli më i rëndësishëm në karrierë për futbollistin italian.
Gjatë tërë karrierës, përfshirë këtu edhe golin ndaj gjigantit katalunas, Acerbi i ka shënuar 26 gola mes Serie A, Serie B, Liga e Kampionëve, Liga e Evropës dhe Kupa e Italisë.
Ato gola kanë ardhur pas më shumë se 500 ndeshjeve në karrierë për Lazio, Sassuolo, Reggina, Chievo Verona, Milan e Inter.
Para se të mbërrinte këtu, ai e kishte pasur një jetë ferri.
Acerbi i kishte mposhtur dy herë kancerin, depresionin dhe varësinë nga alkooli. Çfarë shembulli… /Gazeta Express
