Një konflikt i armatosur kishte tronditur banorët e fshatit Gojbulë të Vushtrrisë më 2 tetor 2024, ngjarje kjo që ngjasonte me skena nga filmi ‘The Godfather’. Sipas Prokurorisë, aty me armë mes veti ishin gjuajtur Arsim Ademi e Fatmir Gerbeshi. Krejt kjo kishte ndodhur para syve të policisë, të cilët paraprakisht kishin shkuar ta zgjidhin mosmarrëveshjen.
Veriu.info mëson se dy të pandehurit, Arsim Ademi e Fatmir Gerbeshi, Gjykata Themelore e Mitrovicës i ka dënuar me burgim. Arsim Ademi është dënuar prej dy (2) vite e tetë (8) muajsh dhe dënim me gjobë në shumën prej 2,000.00 euro, ndërsa Fatmir Gerbeshi është dënuar me dy (2) vite e gjashtë (6) muaj burgim dhe dënim me gjobë në shumën prej 5,000 euro.
Veriu.info ka parë aktakuzat, raportet policore dhe shkresat nga shqyrtimi gjyqësor, të cilat i ka siguruar nga policia, prokuroria dhe gjykata.
Në shkresat e lëndës të policisë dhe prokurorisë thuhet se më datë 02.10.2024 Fatmir Gerbeshi e Rrahman Gerbeshi, së bashku me disa persona tjerë, kishin shkuar të punonin tokën që e kishin blerë afër shtëpisë së Arsim Ademi, ku ky i fundit, që në atë moment gjendej jashtë shtëpisë, e kishte telefonuar policinë me arsyetim se familja po frikësohet nga të lartëcekurit. Pas arritjes së policisë, në shtëpinë e tij kishte arritur edhe Arsim Ademi, i cili kishte shtënë disa herë me armë, të cilave u ishte kundërpërgjigur Fatmir Gerbeshi.
Policia kishte arrestuar Arsim Ademin në vendngjarje te shtëpia e tij, përderisa Fatmir Gerbeshi kishte ikur nga vendngjarja dhe kishte qendruar në arrati deri më 27.01.2025.
Disa muaj pas ngjarjes Prokuroria Themelore e Mitrovicës kishte ngritur aktakuzë ndaj Arsim Ademi për veprën penale “vrasje e rëndë në tentativë”, ndërsa ndaj Fatmir Gerbeshi kishte ngritur aktakuzë për veprën penale “vrasje në tentativë”. Për shkak të qendrimit për disa muaj në arrati të Fatmir Gerbeshi, prokuroria ua kishte veçuar rastet.
Dje, burime të Veriu.info nga Prokuroria Themelore e Mitrovicës kishin bërë të ditur se janë shpallur aktgjykimet ndaj dy të pandehurve, por që Gjykata Themelore e Mitrovicës nuk kishte lëshuar njoftim.
Veriu.info ka dërguar pyetje në Gjykatën Themelore të Mitrovicës për të konfirmuar shpalljen e aktgjykimit për Arsim Ademi, ku kemi marrë konfirmim nga zyra për informim.
“Ju informoj se i pandehuri A.A. ka qenë i akuzuar për veprën penale Vrasje e rëndë në tentativë nga neni 173 paragrafi 1, nënparagrafi 1.5, e lidhur me nenin 28 të KPRK-së, si dhe për veprën penale Mbajtje në pronësi, kontroll ose posedim të paautorizuar të armëve nga neni 366 paragrafi 1 i KPRK-së. Pas përfundimit të shqyrtimit gjyqësor, trupi gjykues ka bërë rikualifikimin e veprës penale nga pika I e dispozitivit të aktakuzës, ashtu që nga vepra penale Vrasje në tentativë, nga neni 172 i lidhur me nenin 28 të KPRK-së, është ri-kualifikuar në veprën penale Përdorimi i armës apo mjetit të rrezikshëm, nga neni 367 paragrafi 2 i KPRK-së. Për veprën penale Përdorimi i armës apo mjetit të rrezikshëm nga neni 367 paragrafi 2 i KPRK-së, është shpallur fajtor dhe i është shqiptuar dënim me burgim prej 2 vjetësh dhe dënim me gjobë prej 2,000 eurosh, ndërsa për veprën Mbajtje në pronësi, kontroll ose posedim të paautorizuar të armëve, nga neni 366 paragrafi 1 i KPRK-së, është shpallur fajtor dhe është dënuar me 1 vit burgim”, thuhet në përgjigjen e Zyrës për Informim të Gjykatës.
Tutje, Udhëheqësja e Zyrës për Informim të Gjykatës Themelore të Mitrovicës, Hateme Haxhaj Haziri bën të ditur se: “Gjykata i ka shqiptuar dënim unik: dënim unik me burgim në kohëzgjatje prej dy (2) vite e tetë (8) muajsh dhe dënim me gjobë në shumën prej 2,000.00 (me fjalë: dy mijë) euro, të cilat dënime do të ekzekutohen pas plotfuqishmërisë së aktgjykimit.”
Zyra për Informim e Gjykatës ka konfirmuar edhe dënimin e shqiptuar për Fatmir Gerbeshi, duke bërë të ditur se të njëjtit i është vazhduar masa e paraburgimit deri në plotfuqishmërinë e aktgjykimit.
“Në çështjen penale ndaj të akuzuarit F.G. sipas lëndës PKR.nr.25/2025, më datë 15.09.2025 është bërë shpallja publike e aktgjykimi, ashtu që i pandehuri është shpallur fajtor për veprën penale ‘Përdorimi i armës apo mjetit të rrezikshëm’, sipas nenit 367 paragrafi 1 të KPRK-së, dhe është dënuar me burgim në kohëzgjatje prej dy (2) vitesh si dhe me gjobë në shumën prej 5,000 (pesë mijë) euro. Për veprën penale ‘Mbajtja në pronësi, kontroll ose posedim të paautorizuar të armëve’, sipas nenit 366 paragrafi 1 të KPRK-së, i pandehuri është dënuar me burgim në kohëzgjatje prej një (1) viti. Në kuptim të nenit 76 të KPRK-së, Gjykata i ka shqiptuar të pandehurit F.G. dënim unik me burgim në kohëzgjatje prej dy (2) vjetësh e gjashtë (6) muajsh, si dhe denim me gjobë në shumën prej 5,000 euro. Gjithashtu, gjykata i ka vazhduar të pandehurit masën e paraburgimit deri në plotfuqishmërinë e aktgjykimit, por jo më gjatë sesa dënimi i shqiptuar me burgim.”, thuhet në përgjigjen e Gjykatës për Veriu.info.
Veriu.info ka dërguar pyetje edhe në Prokurorinë Themelore të Mitrovicës, ku i kemi pyetur se a janë të kënaqur me aktgjykimet ose a do të bëjnë ankesë në Gjykatën e Apelit, pasi që trupi gjykues ka bërë rikualifikim të veprave penale nga ‘vrasje në tentativë’ në ‘Përdorimi i armës apo mjetit të rrezikshëm’ për Arsim Ademi e Fatmir Gerbeshi, ku në përgjigjen e Prokurorisë Themelore të Mitrovicës thuhet: “Prokuroria ende nuk e ka pranuar aktgjykimin për këtë rast. Pas pranimit të aktgjykimit, do të vendoset se si të procedohet tutje”.
