Presidentja Vjosa Osmani mori një pyetje mbi bllokadën aktuale në Parlamentin e Kosovës gjatë një diskutimi në Institutin Hudson në SHBA pas lavdëroi demokracinë e vendit si “të përsosur”.
Profesori i John Hopkins, Daniel Serwer, që merret me zhvillimet në Kosovë e rajon, e pyeti Osmanin se sa janë shpresat për zhbllokim të situatës, raporton Gazeta Express.
“Më lejoni të bëj pyetjen e vështirë. Ju e përshkruani demokracinë si të patëmetë, por ajo është e bllokuar tani. Cilat janë shpresat tuaja për ta zhbllokuar atë dhe a ka nevojë për një reformë më fundamentale në Kushtetutë, në mënyrë që kjo të mos ndodhë përsëri?”, pyeti Serwer.
“Në kushtetutën tonë, kur e hartuam, ishte e pamundur të parashikohej çdo skenar i vetëm. U hartua në një mënyrë me një mendim pozitiv, që ligjvënësit do të bashkëpunonin, në vend që të bllokonin njëri-tjetrin dhe institucionin. Pra, tani për tani, për shkak të një mungese qartësie kushtetuese, nëse mund ta quaj kështu, Parlamenti nuk është konstituuar. Por patëm një rast të ri në gjykatën Kushtetuese dhe gjykata ka sqaruar se ekziston ky afat i rreptë 30-ditor, i cili do të skadojë më 26 korrik, për Kushtetutën e Parlamentit. Por nuk sqaroi se cilat janë pasojat ligjore të mosrespektimit të atij afati të detyrueshëm kushtetues. Pra, duket se do të më duhet t’i drejtohem përsëri gjykatës dhe t’u bëj atyre atë pyetje të veçantë, dhe shpresoj se ata do të përgjigjen”.
Osmani tha se s’ka shpresa se “gjëra të mira” mund të ndodhin në dy javët e ardhshme ose më shumë.
“Ndoshta mund të kemi një qeveri, pavarësisht se sa e brishtë është, por na duhet një qeveri dhe një parlament i konstituuar, në mënyrë që të parandalojmë dëmet për vendin. Por kur thashë të përsosur, thashë kryesisht në kuptimin e mbrojtjes së vlerave, në vend të problemeve të zakonshme me të cilat përballet çdo demokraci. Dua të them, Belgjika nuk kishte një qeveri për gjashtë muaj, një herë në dy vjet. Pra, ne kemi ndërtuar institucione mjaft të qëndrueshme, do të thosha, që mund të merren me punën e përditshme të drejtimit të vendit”.
“Dhe Presidentja është këtu, kështu që mos u shqetësoni”, tha Osmani në fund të përgjigjes.
