Verën e kaluar FC Vushtrria kishte prezantuar biznesmenin Shaip Mikullovci si sponsorin kryesor, duke thënë se ky është shpresa e fundit për ta arritur suksesin.
Kur jemi në pjesë e fundit të kampionatit për sezonin 2024-25, FC Vushtrria po përballet me krizë të madhe financiare, sa që lojtarët nuk kanë marrë pagat gati për tre muaj.
“Lojëtarët janë të pakënaqur me menaxhimentin e klubit, pasi që nuk i kanë marrë hala rrogat e shkurtit dhe marsit, e tash jemi në fund të prillit, që gati po bëhen tre muaj pa rroga. Ka pasur shumë shpresa kur sponsor kryesor i klubit ka ardh Shaip Mikullovci i Interex-it, por na ka dëshpëru shumë. Ai veç nepotizëm ka bërë, duke e vendosur drejtor sportive dhëndrrin e tij (burrin e motrës) Liridon Ahmetin që nuk din aspak me menaxhu”, ka thënë një burim i Veriu.info Brenda FC Vushtrria.
Veriu.info ka kontaktuar me Kryetarin e FC Vushtrria, Shemsi Rrahimi, por ai sapo ka dëgjuar pyetjen e gazetarit që është për mos ekzekutim të pagave të futbollistëve e ka mbyllur telefonin, përderisa kontakti me Drejtorin e Klubit, Liridon Ahmeti ka qenë i pamundur, pasi që ai nuk e ka hapur telefonin.
Burime të Veriu.info bëjnë të ditur se edhe përkundër që lojëtarët e FC Vushtrria janë pa paga prej janarit, disa prej drejtuesve të klubit kanë marrë pagat për muajt shkurt dhe mars, por këtë nuk kemi mundur ta konfirmojmë akoma.
Si pasojë e mos menaxhimit të mirë të klubit, FC Vushtrria nuk ka siguruar akoma hyrjen në Supërligën e Kosovës në Futboll, pasi që gjendet në vendin e dytë të Grupit B në Ligën e Parë, pas ekipit të suksesshëm Prishtina e Re.
Ndryshe, sponsori kryesor i FC Vushtrria, Shaip Mikullovci është pronar i kompanive të fuqishme EMONA Sh.P.K, CDI -Kosovo L.L.C., CDI IP SH.P.K. dhe Proex SH.P.K., kompani e cila menaxhon me rrjetin e super marketeve “INTEREX”.
Veriu.info kishte raportuar vitin e kaluar, se pas zyrtarizimit të Shaip Mikullovcit si sponsor kryesor i FC Vushtrrria, kryetar i këtij klubi ishte zgjedhur Shemsi Rrahimi – ish punëtor i kompanisë EMONA që është në pronësi të Shaip Mikullovcit. Rrahimi paraprakisht për shumë vite ishte Kryetar i Bashkësisë Ismale të Vushtrrisë, gjë që emërimi i tij si kryetar i FC Vushtrria kishte ngjallur dyshime me aftësinë e tij për të menaxhuar një klub sportiv.
Ndërkaq, Drejtor i FC Vushtrria është Liridon Ahmeti, i cili është dhëndërr i Shaip Mikullovcit.
Foto: Drejtor i FC Vushtrria, Liridon Ahmeti me bashkëshorten – motrën e sponsorit gjeneral – Shaip Mikullovci
Kujtojmë së themelimi i FC Vushtrria, emri i së cilës u ndërrua disa herë, është themeluar në vitin 1922, ndërsa kampion i Kosovës në futboll ishte shpallur në sezonin 2013-14, kohë kur sponsor i klubit ishte fabrika e llamarinës në Vushtrri.
A solli ters procesi i zgjedhjes së kryetarit të klubit? FC Vushtrria dështoi të fiton ndaj FC KEK-u
