Në takimin e mbajtur dje ndërmjet Kryetarit të PDK-së, Memli Krasniqi, dhe të Ngarkuarës me Punë të Shteteve të Bashkuara të Amerikës në Kosovë, Anu Prattipati, në të cilin ishte i pranishëm edhe deputeti Abelard Tahiri, u ngrit me shqetësim çështja e vendimit të fundit të Gjykatës Komerciale që, sipas PDK-së, dëmton rëndë interesin publik.
“Z. Krasniqi dhe unë shprehëm shqetësimin e PDK-së lidhur me gjendjen e gjyqësorit në Kosovë, veçanërisht për vendimin e Gjykatës Komerciale për të detyruar Ndërmarrjen Publike Banesore që të përmbushë një kontratë në favor të një konsorciumi të kompanive private, megjithëse afati ligjor për zbatimin e saj kishte skaduar,” deklaroi deputeti Tahiri.
Sipas tij, ky vendim jo vetëm që bie ndesh me ligjin, por godet drejtpërdrejt interesin publik dhe taksapaguesit e Republikës së Kosovës.
Në këtë drejtim, Partia Demokratike e Kosovës ka marrë vendim të angazhohet pro bono për të kundërshtuar këtë vendim në Gjykatën e Apelit, përmes avokatit Faton Fetahu dhe ekipit të juristëve të partisë.
“Përkushtimi ynë për mbrojtjen e interesit publik dhe të drejtave të qytetarëve do të mbetet i palëkundur,” përfundoi Tahiri.
Ditë më parë, Tahiri kishte thënë se Gjykata Komerciale, e themeluar nga Albulena Haxhiu dhe Grupi Parlamentar i Lëvizjes Vetëvendosje, ka vendosur që të dëmtojë interesin publik duke pasuruar një kompani private në dëm të interesit të përgjithshëm dhe taksapaguesve të Republikës së Kosovës.
Gjykata Komerciale, pas shqyrtimit të padisë së një konsorciumi të kompanive private, të cilat kishin kontratë me Ndërmarrjen Publike Banesore për ndërtimin e përbashkët të mbi 60 mijë metrave katrorë, ka vendosur në mënyrë të kundërligjshme dhe të pashembullt që ta detyrojë Ndërmarrjen Publike Banesore të përmbushë një kontratë, afati ligjor i zbatimit të së cilës kishte skaduar.
Kjo kontratë e dëmshme ishte lidhur në mandatin e dytë qeverisës të Lëvizjes Vetëvendosje në Prishtinë (2017-2021) e të cilën, PDK, jo vetëm se e ka kundështuar por edhe në rrugë ligjore e kemi kërkuar anulimin e saj.
Edhe pse kërkesëpadia e këtij konsorciumi privat kishte si kërkesë të parë përmbushjen e kontratës dhe si kërkesë të dytë kompensimin e dëmit material dhe fitimit të humbur në vlerë prej mbi 36 milionë euro, Gjykata Komerciale e Kosovës as nuk e refuzoi kërkesën për kompensim të dëmit, por e detyroi Ndërmarrjen Publike Banesore të përmbushte një kontratë, zbatimi i së cilës asnjëherë nuk kishte filluar. Si rrjedhojë, vendimi i gjykatës për të përcaktuar një detyrim për përmbushjen e saj ishte i pabazë dhe i kundërligjshëm.
