Kryetari i Prishtinës, Përparim Rama, ka reaguar ashpër pas zgjedhjes së Albin Kurtit për Kryeministër të Kosovës, duke e kritikuar mënyrën e sigurimit të votave dhe gjuhën e përdorur nga Kurti në seancën e Kuvendit.
Rama ka deklaruar se Kurti, sipas tij, është zgjedhur Kryeministër me votat e deputetëve të Vetëvendosjes dhe Listës Serbe, duke theksuar se në sallë nuk ishte asnjë deputet tjetër shqiptar.
“KRYEMINISTËR I VETËVENDOSJES DHE LISTËS SERBE!”, ka shkruar Rama në reagimin e tij.
Ai ka akuzuar Kurtin se gjatë viteve në politikë nuk ka arritur të ndërtojë besim me asnjë subjekt tjetër politik shqiptar, ndërsa ka ngritur pikëpyetje për raportet e tij me Listën Serbe.
Rama është ndalur edhe te deklarata e Kurtit “me pre me gërshërë”, duke pyetur publikisht se kujt i ishte drejtuar kjo gjuhë.
“Kënd, Albin? Gazetarët? Opozitën? Kundërshtarët politikë? Apo 52.87% e qytetarët që nuk të kanë votuar?”, ka shkruar ai.
Sipas Ramës, më shumë se gjysma e qytetarëve që kanë votuar në zgjedhje nuk e kanë mbështetur Vetëvendosjen, andaj, siç shprehet ai, një Kryeministër duhet të përfaqësojë të gjithë qytetarët dhe jo vetëm votuesit e partisë së tij.
“Këtu fillon dallimi ndërmjet liderit të një partie dhe Kryeministrit të një shteti”, ka shkruar Rama.
Kryetari i Prishtinës ka kritikuar gjithashtu mënyrën e ushtrimit të pushtetit nga Kurti, duke e akuzuar për përdorim të “hileve dhe numrave” dhe për koordinim me deputetët serbë.
“Kosova nuk ka nevojë për një Kryeministër që di vetëm t’i mundë kundërshtarët me hile e numra, natën, shpejtë, në seanca të jashtëzakonshme në koordinim me serbët. Ka nevojë për një Kryeministër që i përfaqëson të gjithë”, ka shkruar ai.
Në fund, Rama ka përdorur gjuhë edhe më të ashpër ndaj Kurtit, duke deklaruar se ai nuk e përfaqëson popullin e Kosovës.
“Sot, nga ajo sallë, Albin Kurti dole si Kryeministër i Vetëvendosjes dhe Listës Serbe”, ka përfunduar Rama.
