Në media është raportuar për arrestimin nga Policia e Kosovës të Valon Llukës, ish drejtorit të kompanisë Mabetex Holding.
Arrestimin e Valon Llukës në një prononcim për Veriu.info e ka konfirmuar edhe zëdhënësja e Prokurorisë Themelore në Prishtinë, Kaltrina Shala, e cila ka bërë të ditur se i njëjti dyshohet për veprat penale “Mashtrimi”, “Shperdorimi i pasurise se huaj”, “Keqperdorimi i autorizimeve ekonomike” dhe “Lidhja e kontrates se dëmshme”.
“Referuar kërkesës suaj, ju njoftojmë se me urdhër të Prokurorit të Shtetit, është ndaluar një (1) person me inicialet V.Ll., në kohëzgjatje prej 48 orësh, për shkak se i njëjti dyshohet për kryerjen e veprave penale “Mashtrimi”, nga neni 323, “Shpërdorimi i pasurisë së huaj”, nga neni 318, “Keqpërdorimi i autorizimeve ekonomike”, nga neni 284, dhe për veprën penale “Lidhja e kontratës së dëmshme” nga neni 285 i Kodit Penal të Republikës së Kosovës. Lidhur me rastin në fjalë, Prokurori i çështjes në bashkëpunim me Policinë e Kosovës, po ndërmarrin të gjitha veprimet e nevojshme hetimore, për ndriçimin e plotë të rrethanave të rastit”, ka thënë zëdhënësja Shala për Veriu.info.
Ajo ka bërë të ditur se Prokurori i Shtetit brenda afatit ligjor, do të shqyrtojë mundësinë për caktimin e ndonjërës prej masave të sigurise ndaj të pandehurit.
Ndryshe, Valon Lluka për shumë vite ishte ndër personat më të afërt të Behgjet Pacolli, por që kohëve të fundit kanë pasur përplasje për çështjen e menaxhimit të Aeroportit të Vlorës./Veriu.info
Policia e Kosovës arreston Valon Llukën, ish-drejtor i Mabetex Holding të Behgjet Pacollit
