Kreu i Partisë Social-Demokrate, Dardan Molliqaj me një status në Facebook ka njoftuar se mbështet thirrjen e profesorëve për mbrojtjen e krerëve të UÇK-së në Hagë, shkruan GazetaDemos.
Molliqaj shkruan se kushdo që është i lidhur me përpjekjet popullore për liri duhet të jetë i shqetësuar me rrjedhën që po merr procesi kundër ish-krerëve te UÇK-s së në Hagë.
“Tejzgjatja e procesit është cenim serioz i të drejtës për gjykim të drejtë. Në këtë proces po cenohet parimi i barazisë së armëve midis palëve në gjykim. Në njëren anë e kemi një organ të akuzës që funksionon si sistem, që është i tejfinancuar e që ka kapacitete profesionale e administrative. Në anën tjetër, përballë saj është mbrojtja me avokatët që paguhen sipas detyrës zyrtare. Kjo situatë, ky raport forcash nuk sjell asgjë të mirë.
Avokati sipas detyrës zyrtare çfarë tregon? Statusin dhe rëndësinë që Qeveria denjon për UÇK-në. Sikur secila epokë, secili moment, cfarëdo rasti. Kaq e vlerëson UÇK-në Qeveria, ndërkohë që e gëzon pushtetin në Kosovën e çliruar e të pavarur”, shkruan ai.
Postimi i plotë:
Indiferenca është braktisje
PSD e mbështetë dhe i bashkohet thirrjes së profesorëve të UP-së për mbrojtjen e krerëve të UÇK-së në Hagë. Vendimi administrativ që kufizon mbështetjen financiare duhet ndryshuar. Ajo nuk kërkon as shumicë të dyfishtë as shumicë të theksuar në Kuvend, asnjë votë madje. Asgjë veç vullnetit politik të ministrit. Nëse nuk dinë ta shkruajnë, e bëjmë ne për ta. Veç nënshkrimi na duhet.
Kushdo që në çfarëdo mënyre është i lidhur dhe frymon me përpjekjet popullore për liri duhet të jetë i shqetësuar me rrjedhën që po merr procesi kundër krerëve të Ushtrisë Çlirimtare të Kosovës në Hagë. E vërteta është që në Kosovë shumëkush vuan nga pasojat e këtij procesi të padrejtë, ndërkaq ata që e kanë obligim të përkujdesen për t’u përgjigjur ndaj këtij procesi janë indiferent. Një vendim administrativ është në pyetje, ai nuk po ndryshohet.
Përveç kornizës së padrejtë dhe arbitrare që nga themelimi, vazhdimi i procesit e ka thelluar padrejtësinë dhe i ka rritur arsyet për shqetësmin. Më të vështirë e bën përgjigja e pushtetit ndaj këtij procesi.
Tejzgjatja e procesit është cenim serioz i të drejtës për gjykim të drejtë. Në këtë proces po cenohet parimi i barazisë së armëve midis palëve në gjykim. Në njëren anë e kemi një organ të akuzës që funksionon si sistem, që është i tejfinancuar e që ka kapacitete profesionale e administrative. Në anën tjetër, përballë saj është mbrojtja me avokatët që paguhen sipas detyrës zyrtare. Kjo situatë, ky raport forcash nuk sjell asgjë të mirë.
Avokati sipas detyrës zyrtare çfarë tregon? Statusin dhe rëndësinë që Qeveria denjon për UÇK-në. Sikur secila epokë, secili moment, cfarëdo rasti. Kaq e vlerëson UÇK-në Qeveria, ndërkohë që e gëzon pushtetin në Kosovën e çliruar e të pavarur.
Plangprishës është ai pushtet që jeton në delirin e madhështisë dhe ndërkohë e braktisë frymën, arsyen e pavarësisë. E plogësht dhe pa të ardhme është ajo shoqëri që tregon moskokëqarje për sakrificën, lirinë dhe universalitetin.
