Njohësi i ekonomisë, Adem Qorrolli, ka folur në lidhje me situatën e krijuar në vend nga mos-votimi i buxhetit.
Qorolli tha se përgjegjesia kryesore për këtë bie mbi Qeverinë.
Sipas tij, Qeveria aktuale ka krijuar pengesat administrative dhe politike duke shkaktuar vonesa të panevojshme në procesin e buxhetimit.
Ai tha se Qeveria jo vetëm që nuk ka ndërmarrë veprimet e domosdoshme për të siguruar funksionimin normal të institucioneve lokale por ka ushtruar presion të drejtpërdrejtë mbi to përmes mekanizmave të cilët në thelb kufizojnë autonominë komunale.
“Përgjegjësia për mosmiratimin e buxhetit bie plotësisht mbi Qeverinë. Ajo shihet si aktori kryesor që ka krijuar pengesat administrative dhe politike, duke shkaktuar vonesa të panevojshme në procesin e buxhetimit”.
“Në këtë optikë, veprimet e Qeverisë interpretohen si përpjekje për të centralizuar pushtetin dhe për ta vendosur procesin buxhetor nën kontroll të plotë politik”. deklaroi Qorrolli për “Gazeta Blic”.
Tutje Qorrolli shtoi se Qeveria mban përgjegjësi për keqmenaxhimin e procesit buxhetor, krijimin e pasigurisë financiare për komunat, ushtrimin e presionit mbi funksionimin demokratik dhe shfrytëzimin e buxhetit si mjet politik në vend të mekanizmit zhvillimor.
“Vonesa në alokimin e fondeve, kufizimi i mjeteve të nevojshme dhe kushtëzimi i procedurave perceptohen si mjete për të ushtruar ndikim mbi komunat dhe për t’i bërë ato më të varura dhe më të nënshtruara ndaj vendimeve të ekzekutivit qendror”.
Njohësi i ekonomisë renditi edhe masat urgjente të cilat duhet ndërmarrë për të kaluar vendi këtë krizë.
“Heqja e presionit politik mbi proceset buxhetore,miratimi i menjëhershëm i buxhetit për komunat, transparencë dhe pavarësi në procedurat buxhetore, dialog institucional i rregullt për zgjidhjen e mosmarrëveshjeve, mbikëqyrje efektive për të shmangur përdorimin politik të buxhetit” përfundoi Qorrolli për GazetaBlic.
