Kryeministri Edi Rama ka ashpërsuar gjuhën ndaj protestuesve, duke paralajmëruar pasoja financiare për familjet e të miturve që, sipas tij, përfshihen në akte dhune gjatë protestave që kanë hyrë në ditën e gjashtë. Rama deklaroi se prindërit do të mbajnë përgjegjësi për dëmet e shkaktuara nga fëmijët e tyre, duke paralajmëruar se fatura financiare mund t’i ndjekë deri në fund. Ai i akuzoi disa të mitur se po përdoren si mburojë nga persona të tjerë që qëndrojnë pas protestave.
Kreu i qeverisë paralajmëroi gjithashtu masa ndaj nxënësve dhe studentëve që, sipas tij, braktisin mësimin për t’u përfshirë në akte dhune ndaj Policisë së Shtetit. Rama tha se ata do të përballen me pasoja administrative, ndërsa studentët që marrin pjesë në dhunë, sipas deklaratës së tij, nuk do të përfitojnë bursa dhe mbështetje financiare nga shteti. Deklaratat vijnë në një kohë kur protestat kundër qeverisë janë shoqëruar me tensione dhe përplasje mes demonstruesve dhe policisë.
Rama i drejtoi paralajmërime edhe mësuesve, duke iu referuar një rasti në Lezhë, ku pretendoi se një mësuese kishte nxitur nxënësit të godisnin xhamat e shkollës. Kryeministri deklaroi se mësuesit e përfshirë në veprime të tilla nuk do të punojnë më në institucionet shtetërore. Qëndrimet e tij shënojnë një tjetër përshkallëzim të retorikës së qeverisë ndaj protestave, duke përfshirë në paralajmërime jo vetëm protestuesit, por edhe prindërit, studentët dhe personelin arsimor.
