Shtetet e Bashkuara të Amerikës festojnë sot Ditën e Pavarësisë.
Amerika është aleati më i madh dhe miku i jashtëzakonshëm i Kosovës që ka ndihmuar në çlirimin dhe shtetndërtimin vendit.
Por, këto marrëdhënie janë parë si më të luhaturat që ka patur Kosova me SHBA-të në 20 vitet e fundit.
Njohësi i zhvillimeve politike, Burim Ramadani, duke folur në lidhje me këtë çështje tha për “Gazeta Blic” se gjatë këtyre viteve të fundit ka pasur humbje të shumë mundësive për partneritet special me SHBA.
Ramadani tha se kjo ka ardhur kryesisht për shkak të taktikave kosovare në mungesë të një strategjie nacionale.
“Besoj që gjatë këtyre viteve të fundit ka pasur humbje të shumë mundësive për partneritet special me SHBA.Kjo kryesisht për shkak të taktikave kosovare në mungesë të një strategjie nacionale” tha Ramadani për “Gazeta Blic”.
Ai tha se marrëdhëniet me SHBA-në janë ekzistenciale për Kosovën, lirinë dhe mirëqenien e shtetit tonë.
“Marrëdhëniet me SHBA-në janë ekzistenciale për Kosovën, lirinë dhe mirëqenien e shtetit tonë. Në këtë kuptim, prezenca e vazhdueshme e trupave amerikane i ka dhënë dhe i jep sigurinë e nevojshme shtetit të Kosovës. Po ashtu, mbështetja në politikën e jashtme është dëshmuar të jetë vendimtare për synimet e Kosovës.
Prandaj, Kosova duhet të hap kapitull të ri me SHBA, kapitullin e partneritetit special” tha Ramadani
