Zëvendëskryeministri Besnik Bislimi ka demantuar raportimet në media serbe se Kosova ka refuzuar një takim trepalësh të nivelit të kryenegociatorëve në Bruksel.
Bislimi tha se Kosova e ka pranuar takimin trepalësh sipas agjendës së caktuar nga ndërmjetësi, Bashkimi Europian, por tha se Serbia ka qenë ajo që ka refuzuar me tendencën që të imponojë pika të agjendës, që Bislimi i quajti si pika për konsum të brendshëm politik, raporton Gazeta Express.
“Për bisedimet e ardhshme të procesit të dialogut në Bruksel të caktuara për 17 shtator, Kosova ka pranuar një takim trepalësh, sipas agjendës së caktuar nga ndërmjetësi. Fatkeqësisht, Serbia e ka refuzuar një takim të tillë duke u përpjekur që të imponojë pika të rendit në agjendë që ishin të destinuara për konsum të brendshëm politik”.
Bislimi për këtë ka kërkuar që këto informata të demantohen nga ndërmjetësi Miroslav Lajçak.
“E ftoj Përfaqësuesin Special të BE-së Lajcak të mohojë dezinformimin e qëllimshëm nga mediat serbe më poshtë, të cilat thonë në mënyrë të rreme se Kosova ka refuzuar takimin trepalësh të kryenegociatorëve”, ka shkruar Bislimi në X, duke shpërndarë një lajm të mediumit serb “Tanjug”, i cili raporton duke iu referuar burimeve se “Kosova ka refuzuar një takim trepalësh”.
https://x.com/BislimiBesnik/status/1834585807023169580?ref_src=twsrc%5Etfw%7Ctwcamp%5Etweetembed%7Ctwterm%5E1834585807023169580%7Ctwgr%5E3bdd50597d18a5683c3febf87c0fe94857689309%7Ctwcon%5Es1_&ref_url=https%3A%2F%2Fteve1.info%2Fbislimi-demanton-mediat-serbe-se-kosova-ka-refuzuar-takim-trepalesh-ne-bruksel%2F
Tanjug ka raportuar se një nga temat e propozuara nga Beogradi për të qenë në rend dite “është çështja e Urës së Ibrit, si dhe formimi i Asociacionit të Komunave Serbe”.
Për temën e Urës së Ibrit Kosova refuzon të flasë në dialogun me Brukselin, ndërkaq edhe vetë Lajçak në vizitën që pati në Prishtinë la të nënkuptojë se kjo çështje nuk është në plan të diskutohet në dialogun Kosovë-Serbi, por vetëm mes Kosovës dhe komunitetit ndërkombëtar.
