59 persona janë paraqitur në spital pas lëndimeve të marra gjatë protestës së djeshme në Tiranë.
Sipas raportimeve, nga të lënduarit, 34 janë efektivë policie, 21 janë protestues dhe 4 janë kalimtarë, mes të cilëve edhe një i mitur, shkruan Euronews Albania.
Tensionet dhe përplasjet nuk kanë munguar gjatë protestës së sotme, ndërsa vetëm pak minuta më parë është mbyllur revolta e të rinjve dhe studentëve, e cila pritet që nesër të hyjë në ditën e saj të gjashtë.
Gjithashtu RTSH shkruan se, shefi i Komisariatit Nr. 3 në Tiranë ka mbetur i plagosur gjatë protestës së ditës së shtunë, e cila u shoqërua me përplasje të forta mes protestuesve dhe forcave të policisë.
Sipas informacioneve, ai ka pësuar dëmtime në kokë dhe ka marrë 12 të qepura për shkak të plagës së shkaktuar.
Ngjarja vjen pas orësh të tëra tensionesh në Tiranë, ku protestuesit kanë hedhur gurë, molotovë dhe mjete piroteknike në drejtim të efektivëve, ndërsa policia ka ndërhyrë me gaz lotsjellës dhe autobotë uji për shpërndarjen e turmës.
