Jashari shprehet për Gazetën Blic se një rritje e tillë është e pamjaftueshme, ironike dhe të papranueshme për SBASHK-un, e që sipas tij mund të lexohet edhe si veprim për vota.

“Një rritje e papritur por e pritur me zhgënjim, dhe nuk është dashur të ndodhë kështu, ngase Qeveria Kurti ka deklarur se ka mjaft buxhet dhe është dashur ta bëjmë një lëvizje që në këtë muaj, tetor, që të mos i vie era dhe mos të lexohet nga dikush tjetër se në janar po bëhet, sepse janari do të jetë një muaj i tërë i fushatës zgjedhore ku mund të lexohet se në janar u bë një rritje qoftë edhe kjo ironike në mos po fitohet ndonjë votë me këto lëvizje të pagave, që janë tepër të pamjaftueshme, ironike dhe të papranueshme për SBAShK-un”, tha Jashari në një prononcim dhënë për GazetaBlic.

Mbi këtë rritje kryetari i SBAShK-ut vë dyshim.

“Por, t’i thuhet punëtorëve të sektorit publik se do t’ua rrisim pagat duke ua lëvizur koeficientin, dyshimet janë të natyrshme, kur këta e përmendin edhe korrikun që është shumë pas zgjedhjeve dhe nuk dihet  se kush do ta zgjedh Kosovën, atëherë dhe e keqja më e madhe për ta bërë një lloj propagande të keqe është edhe kur njerëzit nga institucionet formojnë një tabular duke mos e paraqitur janarin me atë 0.5 ose 55 euro, por e japin tabelarin se si do të do të duken pagat në korrik kur gjoja se qeveria po lëviz më ua shtu të gjithëve një koeficent”, deklaroi Jashari.

Ndër të tjera, kreu i SBASHK-ut thekson se janë në proces e sipër dhe se nëse nuk ndryshon asgjë, do të kemi edhe veprime sindikale.

“Ne kemi shpërndar në të gjithë institucionet që nga çerdhet e deri në universitetet deklarime duke kërkuar nga anëtarësia që ajo ta thotë fjalën e vet se a do të vazhdohet kështu me dialog me komunikim me letra, me shkresa apo ndoshta anëtarësia dikur bëhet mjaft dhe do të kërkojë nga ne edhe veprime sindikale, cilat do veprime që anëtarësia vendos t’i bëjmë ne, do t’i bëjmë”, shtoi ai.

Ajo çka do ta shtyjë këtë sindikatë drejt veprimeve të tyre është edhe ‘injorimi’ siç e tregon Jashari, që po i bëhet nga Ministrja e Arsimit, Arbërie Nagavci.

“Ministrja Nagavci sillet në mënyrë të çuditshme , sillet edhe në kundërshtim me rregullat, sillet si kundërshtuese e SBAShK-ut, këtë e tregoi edhe me rastin e kontratës së re kolektive, pasi që ishte punuar drafti, pasi që kishte qenë edhe në diskutim publik në mes anëtarësisë e lutem me shkresa që ajo ta pranojë në mënyrë solemne, ajo nuk doli fare dhe as më keq nga 2 tetori e këtej nuk e kemi asnjë informatë, asnjë shkresë nga ajo së paku të jetë zyrtare mohimi i saj se është kundër kontratës. Pra edhe kontrata mund të jetë element shumë kyç që do të ndikojë se anëtarësia jonë të kërkojë veprime sindikale të cilat nuk i deshirojmë”, përfundoi Jashari.