Shqetësimi është rritur në Iran pas njoftimit të Shteteve të Bashkuara për një paketë të re sanksionesh, ndërsa në Teheran janë krijuar radhë të gjata pranë pikave të karburantit. Uashingtoni ka paralajmëruar se synon të ushtrojë presion maksimal ndaj Republikës Islamike dhe të godasë edhe vendet dhe kompanitë që vazhdojnë të bashkëpunojnë me Teheranin.
Në pritje të masave të reja, shumë drejtues automjetesh dhe motoçiklistësh u paraqitën sot në pikat e karburantit në kryeqytetin iranian, mes frikës për ndikimin që sanksionet mund të kenë mbi ekonominë dhe jetën e përditshme.
Sekretari i Thesarit i SHBA-së, Scott Bessant, prezantoi një paketë të re sanksionesh “dytësore”, të cilat synojnë partnerët tregtarë të Iranit dhe sektorë si ari, teknologjia, asetet dixhitale, aviacioni dhe transporti detar. Megjithatë, Uashingtoni nuk ka specifikuar ende se kur do të hyjnë në fuqi masat apo cilat vende do të përfshihen drejtpërdrejt në listën e objektivave.
Kina, partneri kryesor strategjik dhe ekonomik i Iranit, reagoi ashpër ndaj njoftimit amerikan. Zëdhënësi i Ministrisë së Jashtme kineze, Lin Jian, deklaroi se presioni maksimal dhe “lufta ekonomike” nuk i zgjidhin problemet, por rrisin tensionet dhe dëmtojnë ekonominë globale. Pekini paralajmëroi gjithashtu se do të marrë “të gjitha masat e nevojshme” për të mbrojtur të drejtat dhe interesat e tij.
Sanksionet e reja amerikane vijnë pas dekadash masash ndëshkuese ndaj Iranit dhe në një periudhë të tensionuar për vendin, ku presioni ekonomik është shoqëruar me protesta dhe rritje të kostos së jetesës.
Në rrugët e Teheranit, qytetarët shprehen të shqetësuar për ndikimin e masave të reja. Sipas dëshmive të cituara nga Agence France-Presse, iranianët presin që sanksionet të sjellin presion të mëtejshëm mbi ekonominë dhe jetën e përditshme.
“Populli ynë është i fortë. Këto sanksione kanë vazhduar për 47 vjet”, tha një banor i Teheranit, duke shtuar se iranianët nuk kanë frikë nga lufta, por se një konflikt ekonomik mund të ushtrojë presion të madh mbi popullsinë.
Shqetësimet lidhen edhe me mundësinë e rikthimit të protestave masive, të nxitura nga vështirësitë ekonomike dhe kostoja e lartë e jetesës.
Autoritetet iraniane, nga ana tjetër, kanë sinjalizuar se nuk do të dorëzohen përballë presionit amerikan. Teherani kërkon që çdo zgjidhje të bazohet në respektimin e kushteve të memorandumit të mirëkuptimit të arritur në mesin e qershorit.
Kryenegociatori iranian, Mohammad Bayer Ghalibaf, deklaroi në rrjetin social X se amerikanët e dinë se “askush nuk e beson fanatizmin e tyre”.
Edhe ministri iranian i Ekonomisë, Ali Madanizadeh, tha se kërcënimet amerikane do të rezultojnë në “një tjetër humbje” për Uashingtonin. Sipas tij, Teherani ka hartuar një plan dyvjeçar për t’u përballur me pasojat e sanksioneve të reja, pa dhënë detaje mbi masat konkrete.
Ndërsa Uashingtoni shton presionin ekonomik, Irani përpiqet të ruajë partneritetet e tij ndërkombëtare, veçanërisht me Kinën, në një përplasje që pritet të ketë pasoja të drejtpërdrejta për ekonominë dhe popullsinë iraniane.
