Shtetet e Bashkuara të Amerikës siguruan kualifikimin në 1/8 e finales së Kupës së Botës 2026, pasi mposhtën Bosnje e Hercegovinën me rezultat 2-0 në stadiumin “Levi’s Stadium”. Kjo ishte vetëm fitorja e dytë e amerikanëve në fazën me eliminim direkt të Botërorit në nëntë përpjekje.
Atmosfera ishte elektrizuese para fillimit të takimit, me tifozët vendas që krijuan një festë të vërtetë në prag të 250-vjetorit të pavarësisë së SHBA-së. Megjithatë, Bosnja ishte skuadra që rrezikoi e para, kur Ermedin Demirović testoi portierin Matt Freese me një goditje të fuqishme nga zona, por gardiani amerikan reagoi me sukses.
Amerikanët morën kontrollin e lojës dhe në minutën e 30-të menduan se kaluan në epërsi, por goli i Folarin Balogun u anulua për pozitë jashtë loje. Sulmuesi nuk gaboi në fundin e pjesës së parë, kur përfitoi nga një top i devijuar dy herë dhe shënoi për 1-0, duke realizuar golin e tij të tretë në këtë Botëror. Pak çaste më vonë, ai ishte pranë dygolëshit, por goditi traversën.
Bosnje e Hercegovina mori një goditje të rëndë në fillim të pjesës së dytë, pasi kapiteni Edin Džeko u detyrua të largohej për shkak të lëndimit. Megjithatë, në minutën e 64-të, ndeshja mori një kthesë tjetër kur, pas ndërhyrjes së VAR-it, Balogun u ndëshkua me karton të kuq për një ndërhyrje të rrezikshme ndaj Tarik Muharemović.
Pavarësisht epërsisë numerike, boshnjakët nuk arritën të gjenin hapësira ndaj mbrojtjes së organizuar amerikane. Christian Pulisic shënoi në minutën e 79-të, por edhe ky gol u anulua për pozitë jashtë loje.
Pak minuta më vonë, SHBA vulosi fitoren. Malik Tillman realizoi një supergol nga goditja e lirë nga rreth 20 metra, me topin që përfundoi në rrjetë pavarësisht prekjes së portierit Nikola Vasilj.
Në minutat e fundit, Ermin Mahmić provoi me një goditje të fortë, por topi kaloi ngushtë pranë shtyllës. Bosnja nuk arriti të shfrytëzonte epërsinë numerike dhe u eliminua në ndeshjen e saj të parë me eliminim direkt në një Kupë Bote.
Nga ana tjetër, skuadra e Mauricio Pochettinos tregoi karakter të jashtëzakonshëm duke luajtur për më shumë se gjysmën e pjesës së dytë me 10 futbollistë dhe siguroi kualifikimin në 1/8 e finales, ku do të përballet me Belgjikën në Seattle./Express
