Shkencëtarët kanë sugjeruar se konsumimi i një sasie shumë të vogël sheqeri deri në moshën dyvjeçare mund të ndihmojë në mbrojtjen e trurit edhe dekada më vonë.
Studimi analizoi ndikimin e përfundimit të racionimit të sheqerit në Mbretërinë e Bashkuar, i cili çoi në një rritje të shpejtë të sasisë së sheqerit në dietën e njerëzve.
Rezultatet sugjerojnë se personat që ishin fëmijë të vegjël gjatë periudhës së racionimit të sheqerit kishin 23% më pak rrezik për t’u prekur nga demenca.
Megjithatë, studimi nuk mund të japë prova përfundimtare për këtë lidhje, por ekspertët theksojnë se një ushqyerje e shëndetshme është gjithsesi e dobishme për shëndetin e trurit.
Ky nuk është studimi i parë që sugjeron se 1.000 ditët e para të jetës janë vendimtare për shëndetin tonë në të ardhmen.
Një seri studimesh kanë analizuar atë që studiuesit e quajnë një “eksperiment natyror”, të krijuar nga rimëkëmbja e Mbretërisë së Bashkuar pas Luftës së Dytë Botërore dhe përfundimi i sistemit të racionimit të ushqimeve.
Kur racionimi i sheqerit përfundoi në shtator të vitit 1953, konsumi mesatar ditor i sheqerit u vlerësua se u rrit pothuajse menjëherë nga rreth 41 gramë në ditë (rreth 10 kuba sheqeri) në 80 gramë (rreth 20 kuba sheqeri).
Studime të mëparshme e kanë lidhur këtë rritje me shtimin e rasteve të diabetit të tipit 2 dhe tensionit të lartë të gjakut vite më vonë.
Studimi më i fundit analizoi të dhënat e afro 65.000 pjesëmarrësve në projektin UK Biobank.
Analiza, e kryer nga Universiteti i Shkencës dhe Teknologjisë i Hong Kongut, krahasoi fëmijët që u rritën para dhe pas përfundimit të racionimit të sheqerit.
Sipas studiuesve, kufizimi i sheqerit deri në moshën dyvjeçare lidhej me një ulje prej 23% të rrezikut për demencë, si edhe me faktin që sëmundja diagnostikohej mesatarisht dy vjet e gjysmë më vonë.
“Gjetjet tona sugjerojnë se kufizimi i sheqerit në fazat më të hershme të jetës mund të ketë përfitime afatgjata për shëndetin e trurit,” tha studiuesja Jiazhen Zheng.
Rezultatet e studimit janë publikuar në revistën shkencore Neurology.
Megjithatë, Zheng theksoi se “nevojiten kërkime të mëtejshme” për të kuptuar nëse është vërtet sheqeri ai që shkakton këtë efekt.
