Institucionet e Kosovës kanë rritur ndjeshëm shpenzimet e luksit gjatë vitit 2022. Ato kanë tejkaluar këto shpenzime madje dukshëm në raport me vitet paraprake, 2021 dhe 2020.
Rritja e shpenzimeve të luksit për udhëtime zyrtare, akomodim jashtë vendit, mëditje për udhëtime zyrtare, dreka dhe darka zyrtare, karburante dhe shërbime telefonike, ka ndodhur në kohën kur në krye të Qeverisë është kryeministri Albin Kurti. Ky sa ishte në opozitë kishte “gozhduar” me kritika për luksin e tepruar kundërshtarët e tij politikë, Ramush Haradinajn e AAK-së dhe Avdullah Hotin e LDK-së, të cilët kanë udhëhequr me ekzekutivin e vendit, më 2020 dhe 2021.
Zyrtarët shtetërorë kanë shpenzuar gjatë vitit të kaluar gjithsej 21.7 milionë euro për meditjet, udhëtimet zyrtare, drekat, karburantet për vetura, shërbimet telefonike si dhe akomodim, raporton Instituti për hulumtime Front, duke u bazuar në dokumentet zyrtare të Ministrisë së Financave.
Kjo vlerë është më e lartë sesa ajo e viteve paraprake, 2020 dhe 2021.
Në një krahasim mes tri viteve del se institucionet kanë shpenzuar 8.2 milionë euro më shumë në vitin 2022 sesa në 2021-ën dhe 9.8 milionë më shumë se në vitin 2020.
Shteti kishte harxhuar 11.9 milionë euro për shpenzimet e luksit më 2020. Kurse 13.5 milionë sosh, më 2021.
Zyrtarët shtetërorë kanë marrë hiç më pak se 2.6 milionë euro për meditje sa i përket udhëtimeve zyrtare jashtë vendit për vitin 2022.
Kjo shifër peshon më shumë sesa në vitin 2021, kur të njëjtit morën 1.2 milionë euro dhe më tepër sesa në vitin 2020, kur u shpërblyen me 1.1 milionë euro.
Shpenzime “qiellore” për udhëtimet zyrtare jashtë Kosovës
Zyrtarët shtetërorë kanë harxhuar 2.5 milionë euro për udhëtimet zyrtare jashtë vendit gjatë 2022-ës.
Ministria e Financave pagoi për të njëjtën arsye 1.3 milionë më 2021-ën, raporton Instituti për hulumtime Front.
