Një ankesë e dorëzuar në Organin Shqyrtues të Prokurimit (OSHP) nga kompania “2A Group” SH.P.K me pronar biznismenin Valon Ademi e njohur nga historia e skandalit në Aeroportin e Vlorës, ka rezultuar me publikimin e të dhënave personale të tre pronarëve përfaqësuesve të një biznesi në dokumente publike të qasshme për të gjithë.
Bëhet fjalë për një ankesë të paraqitur në kuadër të tenderit multimilionësh për mirëmbajtjen verore dhe dimërore të rrugëve nacionale dhe rajonale, ku kompania e Valon Ademit ka kundërshtuar shpalljen e fituesve për Lotin 9 dhe Lotin 11.
Në dokumentet e bashkëngjitura në ankesë, kompania ka publikuar pa asnjë anonimizim të dhënat personale të tre përfaqësuesve të operatorit ekonomik “Lika Trade” SH.P.K, të cilat gjenden vetëm në dosjen e plotë të tenderit e cila nuk është publike.
Në dokument mund të shihen qartë emrat, datat e lindjes, adresat, numrat personalë identifikues të letërnjoftimeve, si dhe nënshkrimet e Salih Likës, Shefqet Likës dhe Fadil Likës, përfaqësuesit ligjor të kompanisë “Lika Trade” SH.P.K.
Ndërsa problemi me shkeljen e ligjit qëndron më konkretisht tek publikimi i numrave personal identifikues të leternjoftimit dhe datat e lindjes.
Megjithatë, përgjegjësia nuk mbetet vetëm te kompania ankuese.
Pavarësisht se dokumenti përmbante të dhëna personale të ndjeshme, Organi Shqyrtues i Prokurimit e ka publikuar ankesën në faqen e tij zyrtare pa redaktuar apo fshehur asnjërën prej këtyre të dhënave.
Kjo do të thotë se fillimisht kompania “2A Group” SH.P.K. i ka dorëzuar dokumentet me të dhënat personale të pambuluara, ndërsa më pas OSHP-ja ua ka bërë ato të qasshme publikut përmes publikimit në sistemin zyrtar të institucionit.
Publikimi i numrave personalë identifikues, adresave dhe të dhënave të tjera të individëve nuk ka asnjë vlerë për transparencën e procedurës së prokurimit.
Përkundrazi, bëhet fjalë për të dhëna personale që duhej të anonimizoheshin para se dokumenti të dorëzohej dhe para se të publikohej nga institucioni.
Rasti ngre pikëpyetje serioze respektimin e Ligjit për Mbrojtjen e të Dhënave Personale, si nga kompania ankuese ashtu edhe nga vetë OSHP-ja, e cila kishte detyrimin ligjor të mos publikonte dokumente që ekspozojnë të dhëna personale të qytetarëve./Gazeta Infokus/Veriu.info
