Veriu.info muajin e kaluar ka publikuar ekskluzivisht listën e kompanive të cilave AUV ua kishte hequr licencat e importit të kafshëve të gjalla. Më 18 parill ministri i Bujqësisë në detyrë, Faton Peci kishte njoftuar për heqjen e këtyre licencave për 28 kompani që merren me importin e kafshëve, duke thënë se me dekada janë improtuar në Kosovë kafshë me dokumenta të falsifikuara, që sipas tij, paraqesin rrezik për sigurinë ushqimore deri te evazioni fiskal që i është shkaktuar shtetit në vlera qindra milionëshe, raporton Veriu.info.
Mirëpo, njoftimi i ministrit Peci që u krenua me AUV-in, që ka marrë vendime me të cilat është stopuar importimi i kafshëve me dokumente të faksifikuara me dekada që ka shkaktuar qindra miliona euro dëme shtetit, duke se ka pas vlerë vetëm për pak ditë. Kjo ngase Agjencia e Ushqimit dhe Veterinarisë ka bërë shfuqizimin e shumicës vendimeve për pezullim të lejeve të importit, me arsyetimin se po iu jep shans të dytë këtyre operatorëve ekonomik.
Përmes kërkesës për Qasje në Dokumente Publike, Veriu.info ka siguruar vendimet e Agjencisë së Ushqimit dhe Veterinarisë për pezullimin e lejeve të importit për secilin operatorë ekonomik, ankesat e operëtorëve ekonomik, raportet e shqyrtimit të ankesave dhe deklaratat nën betim të këtyre importuesve të kafshëve të gjalla, të cilat do t’i publikoj në një seri shkrimesh. Por në dokumentet që AUV i ka dorëzuar portalit Veriu.info mungojnë disa vendime dhe procesverbalet e komisionit të ankesave dhe jemi në pritje të tyre.
Nga analizimi i këtyre dokumenteve, shihet se më datë 28 mars 2025, Drejtori Ekzekutiv i Agjencisë së Ushqimit dhe Veterinarisë, Bekim Hoxha, ka nxjerrë vendim për pezullim në ‘Regjistrim të Importit të Kafshëve të Gjalla” për kompaninë NTP “Nushi” me person përgjegjës dhe pronar Mirset Ajeti.
Në pikën dy të vendimit thuhet se pezullohet nga sistemi elektronik “FCMS dhe TRACES” për këtë biznes me adresë në Ferizaj, e cila në Agjencinë për Regjistrimin e Bizneseve figuron të ketë zero (o) kapital.
Në arsyetim të vendimit thuhet se sipas raportit të lëshuar nga inspektorati veterinar kufitar NTP “Nushi” gjatë periudhës janar – mars 2025 kishte importuar katër (4) dërgesa me kafshë të gjalla për therje me një total prej 160 krerësh, të cilat duheshin therur brenda afatit prej 72 orëve në thertore të licencuar, por që kjo nuk ishte bërë.
“Në bazë të dhënave dhe kontratës të subjektit importues të kafshëve të gjalla NTP “Nushi” dhe subjektit të thertores “Loma Family” Sh.P.K., në këtë thertore nuk janë therrur asnjë krerë nga kafshët e importuara. Në stallën e pronarit janë konstatuar vetëm 5 krerë kafshë të gjalla të importuara”, që i bie se 155 kafshë nuk janë therrur në thertore.
Tutje, në arsyetimin e pezullimit të lejes së importit, thuhet se në periudhën tetor – dhjetor 2024, NTP “Nushi” ka importuar 537 kafshë për therje, ku nga ky numër të pa raportuara janë 534 gedhe.
Pra, përkundër që me 23 janar 2025 ishte iniciuar procedura e kundërvajtjes për këtë kompani për 534 kafshë të pa raportuara si të therrura në thertore, ajo është lejuar të importoj kafshë edhe pas gjetjes së kësaj shkelje, më ç’rast i është dhënë mundësia e përsëritjes së veprimeve të kundërligjshme.
Ndaj këtij vendimi të nënshkruar nga drejtori ekzekutiv i AUV, Bekim Hoxha, është ankuar NPT “Nushi”, ankesë e cila i është dhënë pjesërisht (vetëm faqja e parë) portalit Veriu.info përmes qasjes në dokumente publike, ku pretendohet se vendimi për pezullim ëshë i padrejt.
Në raportin e shqyrtimit të ankesës nga Komisioni i Ankesave të AUV më datë 18 prill 2025 thuhet se kompania NTP “Nushi” ka paraqitur ka prezantuar dokumentacion se kafshët janë trajtuar dhe shitur.
Mirëpo, sipas Udhëzimit Administrativ (MBPZhR) – Nr.14/2-24 Për Përcaktimin e Rregullave të Kontrollit Zyrtar Për Kafshët e Gjalla Që Hyjnë Në Territorin e Republikës së Kosovë, të nënshkruar nga ministri i Ministrisë së Bujqësisë, Pylltarisë dhe Zhvillimit Rural, Faton Peci, shitja e kafshëve që në doganë hyjnë si kafshë për therrje është rrepsisht e ndaluar, pasi që ato duhet drejtpërsëdrejti të dërgohen në thertore të licencuar për therrje. (Shkarko Udhëzimin KËTU)
Neni 8 dhe paragrafi 8.1 i këtij udhëzimin thonë se kafshët e destinuara për therje (thundrakët dhe shpendët), pasi të kenë kaluar nëpër pikën e kontrollit kufitar, duhet të transportohen drejtpërsëdrejti në thertore dhe duhet të theret aty sa më shpejt të jetë e mundur, por jo më vonë se 72 orë pas mbërritjes në thertore në përputhje me kërkesat për shëndetin e kafshëve.
Pra, siç shihet edhe në vendimin për pezullim të lejes së importit, NTP “Nushi” ka pasur kontratë me thertoren “Loma Family” Sh.P.K. për therjen e kafshëve të importuara, por që nuk i ka dërguar asnjërën prej tyre.
Megjithatë, Komisioni për Shqyrtimin e Ankesave i ka rekomanduar drejtorit ekzekutiv pranimin e ankesës dhe kthimin e regjistrimit në sistemin FCMS dhe TRACES për NTP “Nushi”, që nënkupton kthimin e lejes së importit për këtë kompani.
Në një listë të dërguar në Veriu.info nga AUV me 25 prill, shihet NTP “Nushi” është në mesin e kompanive që iu është rikthyer leja e importit të kafshëve në Kosovë.
Në lidhje me pezullimin e licencës për këto kompani, ministri Peci kishte thënë se dëmi financiar i shkaktuar nga këta operatorë ekonomik është në vlerë qindra milionë euro, duke shtruar se, sipas tij, është goditur hallka më të fortë të zinxhirit të importuesve të kafshëve të gjalla në Kosovë, duke i mbajtur përgjegjës për tentimin e keqpërdorimit dhe mashtrimit në proces të importit.
