Avokati Xhevdet Smakiqi ka kritikuar ashpër veprimet e kryeministrit Albin Kurti dhe Lëvizjes Vetëvendosje (LVV) për bllokimin e konstituimit të Kuvendit të Kosovës, raporton GazetaBlic.
Sipas Smakiqit, qasja anarkiste dhe bllokuese e Kurtit ka shkaktuar një situatë ku Kosova ka mbetur pa një qeveri funksionale, duke pasur nevojë për dy aktgjykimet e fundit për të sqaruar këtë krizë.
“Fillimisht duhet shtruar qasja se, sikur të mos ishte parti fituese LVV dhe të mos kishte qasje bllokuese me elemente anarkiste, kryetari i saj, Albin Kurti, fare nuk do të kishte nevojë për dy aktgjykimet e fundit. Prandaj, deklarata anarkiste të eksponentëve të LVV-së nuk i befasojnë më askënd, ndoshta as zogjtë e malit”, tha Smakiqi.
Smakiqi ka theksuar se Kushtetuta e Kosovës është shumë e qartë për procedurën e formimit të institucioneve të shtetit dhe për të drejtat e partive fituese, duke i kujtuar se, në rastin e mos-shfrytëzimit të shumicës absolute, çdo parti është e detyruar të arrijë koalicione me palë të tjera për të siguruar shumicën parlamentare.
“Aktgjykimet kanë qenë të qarta prej vitit 2014, kur është përcaktuar që partia më e madhe, grupi parlamentar i partisë fituese, e ka të rezervuar të drejtën e propozimit të kandidatit për Kryetar të Kuvendit të Republikës së Kosovës, por kur sovrani nuk e ka votuar mbi 51%, secila parti detyrohet të arrijë aleanca politike me partitë tjera për ta siguruar shumicën e thjeshtë prej 61 deputetësh. Prandaj, e kam theksuar me bindje të thellë se Kushtetuta e Kosovës, rendi juridik e procedural, është i qartë si kristali në dritën e diellit, por duhet ri-theksuar se Gjykata Kushtetuese nuk rregullon inatet, qasjen anarkiste, refuzuese, bllokuese”, shtoi ai.
Ai ka deklaruar se bllokimi i Kuvendit ka vetëm një origjinë: sjelljen anarkiste të Albin Kurtit, i cili, sipas tij, ka bërë pengesë të mëtejshme në procesin e krijimit të institucioneve funksionale.
Smakiqi ka apeluar për një qasje më të përgjegjshme dhe konstruktive nga ana e liderëve politikë, për të mundësuar funksionimin normal të institucioneve të Kosovës dhe për të shmangur situata të ngjashme në të ardhmen.
“Prandaj, bllokimi i konstituimit të Kuvendit të Kosovës ka vetëm një origjinë dhe ajo është sjellja anarkiste, e papërgjegjshme, bllokuese, anti-shtetërore e një individi që quhet Albin Kurti.Prandaj, sikur të mos ekzistonte kjo qasje anarkiste e një personi me fuqi politike, sot do të diskutonim për 100-ditëshin e Qeverisë nga Legjislatura e IX”, tha Smakiqi për GazetaBlic.
