Gjykata Speciale ka sqaruar për Reporteri.net se data 20 korrik nuk është data kur do të shpallet vendimi lidhur me katërshen e UÇK’së që po gjykohet në Hagë, por vetëm afati për marrjen e vendimit është zgjatur deri atëherë. Nga Specialja kanë paralajmëruar se nëse do të nevojitet më shumë kohë, mund të ketë zgjatje tjetër afati. Prokuroria ka kërkuar nga 45 vjet dënim me burg për secilin.
Afati për shpalljen e aktgjykimit në rastin e Hashim Thaçit, Kadri Veselit, Jakup Krasniqit dhe Rexhep Selimit, është zgjatur edhe për 60 ditë nga Gjykata Speciale.
Zëdhënësja e Speciales, Angela Griep, në një përgjigje për Reporteri.net, ka thënë qartë se gjykata ka nxjerrë vendim për zgjatjen e afatit për shpalljen e aktgjykimit deri në fund të korrikut, por se kjo nuk është data kur do shpallet.
Ajo tha se afati është zgjatur edhe për 60 ditë shkaku i kompleksitetit të rastit.
“Kjo datë nuk është data për shpalljen e aktgjykimit, por vetëm data për zgjatjen e afatit. Trupi Gjykues ka nxjerrë një vendim për zgjatjen e afatit për shpalljen e aktgjykimit gjyqësor edhe për 60 ditë të tjera, deri të hënën, më 20 korrik 2026, për shkak të kompleksitetit të rastit”, thuhet në përgjigjen e Griep.
Griep ka thënë se nëse do të nevojitet kohë shtesë, mund të nxirret edhe ndonjë urdhër tjetër.
“Megjithatë, Trupi Gjykues ka shtuar se, nëse një zgjatje e mëtejshme do të jetë absolutisht e nevojshme, do të nxjerrë një urdhër përkatës në kohën e duhur”, përfundon përgjigja e saj.
Lajmin për shtyrjen e shpalljes së aktgjykimit e ka konfirmuar mbrëmë edhe avokati i ish-presidentit të Kosovës, Hashim Thaçi, Luka Mishetiq.
“Mund ta konfirmoj se kjo është e saktë”, ka deklaruar Mishetiq në përgjigjen e tij në pyetjen e RTK’së nëse raportimi për shtyrjen e vendimit për 20 korrik është i saktë.
Afati 90 ditor për nxjerrjen e vendimit është i përcaktuar sipas Rregullës 159 të Dhomave të Specializuara dhe koha shtesë përveç rasteve ekstreme s’mund ta kalojë 60 ditëshin.
”Aktgjykimi i shkallës së parë shpallet brenda nëntëdhjetë (90) ditëve nga mbyllja e çështjes, në përputhje me Rregullën 136, dhe mund të përfshijë një vendim sipas Nenit 22(7) të Ligjit. Kur rrethanat e çështjes kërkojnë kohë shtesë, ajo nuk duhet të kalojë gjashtëdhjetë (60) ditë, përveç rasteve kur një zgjatje e mëtejshme është absolutisht e domosdoshme. Vendimi për zgjatjen duhet të jetë publik dhe t’u njoftohet palëve dhe përfaqësuesit të viktimave. Për zgjatjen duhet të jepen arsyet”, thuhet në Rregulloren e Gjykatës Speciale.
Sipas kësasj Rregulloreje, Aktgjykimi i shkallës së parë, ose një përmbledhje e tij, shpallet publikisht në emër të popullit të Kosovës dhe në praninë e të akuzuarit, përveç nëse rrethana të jashtëzakonshme arsyetojnë mungesën e tij ose të saj.
Aktgjykimi i shkallës së parë duhet të jetë me shkrim dhe të përmbajë arsyetim për gjetjet e Panelit, derisa në rast të lirimit nga akuza, aktgjykimi mund të shpallet gojarisht, i ndjekur nga arsyetimi me shkrim sa më shpejt që të jetë e mundur.
Katërshja e UÇK’së vazhdojnë të jenë në paraburgim në Hagë që nga viti 2020 që kur Prokuroria Speciale ka ngritur aktakuzë ndaj tyre.
Në fjalët përmbyllëse, ekipet mbrojtëse kanë kërkuar lirim nga të gjitha aktakuzat për Thaçin, Veselin, Krasniqin e Selimin.
Kryeprorkurorja e Zyrës së Prokurorit të Specializuar (ZPS) në Gjykatën Speciale në Hagë, Kimberly Ëest, ka kërkuar nga 45 vjet dënim me burg për secilin, apo 180 vjet gjithsej për katër të akuzuarit e rastit Thaçi dhe të tjerët.
