Një shqetësim është adresuar në redaksinë e JOQ Kosova lidhur me ndërprerjen e angazhimit të mbi 60 infermierëve në Qendrat e Mjekësisë Familjare dhe ambulancat e Komunës së Suharekës.
Sipas personit që ka dërguar informacionin, bëhet fjalë për infermierë të angazhuar përmes një programi të Caritas, të cilëve u është ndërprerë puna brenda një kohe shumë të shkurtër.
Sipas dëshmisë, punëtorët nuk kanë pasur paralajmërim të mjaftueshëm për përfundimin e angazhimit, ndërsa situata ka shkaktuar shqetësim të madh tek ata dhe familjet e tyre.
“Po flasim për njerëz me familje, me vite pune dhe me diploma profesionale, të cilët janë vendosur përballë një pasigurie të madhe ekonomike dhe profesionale”, thuhet në mesazhin e dërguar në redaksi.
Shqetësime janë ngritur edhe për mënyrën se si janë marrë vendimet, pasi pretendohet se disa nga personat kanë vazhduar të punojnë, ndërsa pjesa tjetër është larguar.
Kjo ka ngritur pikëpyetje lidhur me kriteret e përzgjedhjes dhe arsyet e ndërprerjes së angazhimeve.
Punëtorët kërkojnë transparencë nga Komuna e Suharekës dhe institucionet përgjegjëse, duke kërkuar përgjigje për disa çështje:
Pse është ndërprerë angazhimi i një numri kaq të madh të infermierëve brenda një kohe të shkurtër? Cilat kanë qenë kriteret për përzgjedhjen e personave që kanë vazhduar punën? Pse disa infermierë janë mbajtur në punë, ndërsa të tjerëve u është ndërprerë angazhimi? A janë respektuar procedurat dhe kriteret e përcaktuara për përfundimin e këtyre angazhimeve? JOQ Kosova e publikon këtë shqetësim në mënyrë anonime, me kërkesë të punëtorëve, të cilët shprehen se kanë frikë nga pasojat nëse identitetet e tyre bëhen publike.
Për të sqaruar situatën dhe për të garantuar një raportim të balancuar, mbetet e rëndësishme që Komuna e Suharekës dhe institucionet përgjegjëse të japin versionin e tyre lidhur me këto pretendime.
