Liderët e partive politike do të takojnë presidenten Vjosa Osmani të enjten e 3 korrikut, për të diskutuar për bllokadën në Kuvend.
Lidhur me takimin ka folur profesori universitar Ardian Kastrati.
Ai për Gazeta Blic thotë se Osmani ka demonstruar angazhim politik kur kritikonte ashpër Hashim Thaçin dhe Kadri Veselin.
“E vetmja periudhë në të cilën presidentja ka demonstruar angazhim politik ka qenë koha kur kritikonte ashpër Hashim Thaçin dhe Kadri Veselin, për të arritur pozicionin aktual. Megjithatë, në situata komplekse dhe të tensionuara si kjo që përballemi sot, roli i saj mbetet i dobët dhe pa vendimmarrje të fortë. Vlerësimi im është se presidentja është e papjekur në ushtrimin e funksionit kushtetues në raste kritike, duke munguar si aktore me peshë vendimmarrëse dhe strategjike. Ajo ka impakt vetëm ne trashjen e xhirollogarisë saj financiare afër një milionëshe”, është shprehur ai.
Sipas Kastratit, presidentja duhet të ndërmarrë masa të menjëhershme për zhbllokimin e situatës, për shkak të bllokadës.
“Nga një këndvështrim institucional, si komandante supreme në raste lufte apo gjendjesh jashtëzakonshme, presidentja duhet të perceptojë gjendjen si të jashtëzakonshme….edhe kjo krizë bllokadë është jashtëzakonisht serioze dhe ajo duhet të ndërmarrë masa të menjëhershme për zhbllokimin e situatës”, ka potencuar ai për Gazeta Blic.
Ai ka treguar rrugët që duhet t’i ndjek Osmani.
“Së pari, presidentja duhet të inkurajojë partitë politike që të gjejnë një kompromis, duke ndjekur parimet e aktgjykimit të Gjykatës Kushtetuese, që thekson rëndësinë e bashkëpunimit dhe mirëbesimit institucional për të arritur marrëveshje ose për të çuar vendin drejt zgjedhjeve. Në rast të pamundësisë për arritjen e konsensusit, dhe duke pasur parasysh kufizimet kushtetuese të presidentes për shpalljen e zgjedhjeve, ajo duhet të kërkojë interpretim zyrtar nga Gjykata Kushtetuese lidhur me procedurat pas përfundimit të afatit 30 ditor për formimin e institucioneve”, ka vlerësuar profesori.
Ai është skeptik për një zgjidhje nga presidentja, teksa shton se Kurti ka mungesë vullneti për të bashkëpunuar me Osmanin, që e vështirëson më shumë krizën.
Kastrati përmend dhe protestat si mundësi, por që thotë se opozita nuk duket e interesuar për zhbllokim të situatës.
“Megjithatë, bazuar në analizën e performancës së saj në të kaluarën, nuk pritet që Vjosa Osmani të ketë kapacitetin për të sjellë një zgjidhje efektive në këtë kontekst kompleks politik. Përvoja tregon mungesë aftësish për menaxhimin e situatave të ndërlikuara politike dhe institucionale. Nga ana tjetër, mungesa e vullnetit bashkëpunues të kryeministrit Kurti për të koordinuar me presidenten thellon ngërçin institucional, duke e vështirësuar tejkalimin e krizës. Në këtë situatë, perspektiva e zhvillimeve të mëtejshme mbetet e kufizuar. Protestat do të bënin punë, mirëpo opozita aktualisht duket e paorganizuar dhe e pa interesuar për zhbllokim të situatës”, ka deklaruar Ardian Kastrati.
