Deputetja e AAK-së, Time Kadrijaj, ka reaguar ndaj vendimeve të fundit të Qeverisë për zbatimin e Ligjit për të Huajt dhe atij për Automjetet. Ajo ka kritikuar kryeministrin Albin Kurti, duke thënë se ai ka marrë pushtetin dhe përkrahjen për të ndërmarrë veprime që, sipas saj, janë në kundërshtim me qëndrimet e tij të mëhershme.
Kadrijaj vlerëson se këto veprime përbëjnë alarm për qytetarët dhe tregojnë se Kurti po bën koncesione në çështje për të cilat më parë ka qenë kundërshtues i zëshëm, duke përmendur edhe rastin e tokave të Manastirit të Deçanit dhe zhvillimet në Mitrovicë.
‘’ Siç po shihet Albin Kurti ka marrë pushtet dhe ka kapur përkrahjen vetëm për t’i bërë këto gjëra dhe ky është alarm për qytetarët që të kuptojnë cili është vërtetë Albin Kurti. Pas dëshmisë se si u dhuruan tokat e manastirit të Deçanit tash për një diçka që ka ‘luftuar’ apo bërtitur duke u thirrë në sovranitetin në Mitrovicë shohim se Albin Kurti po i bën koncesione’’, tha Kadrijaj për FrontOnline.
Kadrijaj shton se tash është edhe radha e Zajednicës, pasi sipas saj vetëm ajo ka mbetur, dhe se këto veprime janë një parapërgatitje që nesër të pranohet dhe të deklarohet hapur pranimi i saj pas situatës së krijuar me dokumentet e komunitetit serb.
‘’Tash është edhe radha e Zajednicës sepse vetëm ajo i ka mbet sepse këto veprime janë para adresim që nesër ta pranojë dhe të deklarojë hapur që ka pranuar edhe Zajednicën pas kësaj situatë për dokumentet e komunitetit serb’’, tha Kadrijaj për FrontOnline.
