Merkatoja verore po hyn në fazën më interesante, me disa transferime të rëndësishme të konfirmuara në futbollin evropian dhe amerikan.
Më poshtë janë lëvizjet më të spikatura të ditëve të fundit.
Martin Dubravka – nga Burnley te Tottenham (transferim i lirë)
Tottenham ka transferuar portierin me përvojë Martin Dubravka si lojtar i lirë, pas rënies së Burnleyt nga Premier League. Sllovaku pritet të jetë alternativa e dytë pas Antonin Kinskyt.
Robert Lewandowski – nga Barcelona te Chicago Fire (transferim i lirë)
Chicago Fire ka realizuar një nga goditjet më të mëdha të merkatos duke transferuar Robert Lewandowskin pa kosto. Sulmuesi polak pritet të debutojë më 16 korrik kundër Vancouver Whitecaps, ku mund të përballet me ish-bashkëlojtarin e tij te Bayern Munich, Thomas Muller.
Benjamin Cremaschi – nga Inter Miami te Parma (£3 milionë)
Parma ka aktivizuar klauzolën e blerjes për mesfushorin amerikan Benjamin Cremaschi. 21-vjeçari, që sezonin e kaluar luajti si huazim në Serie A, synon të ketë më shumë hapësira pas një sezoni të vështirë për shkak të dëmtimeve.
Michael Cuisance – nga Hertha Berlin te Lens (£4 milionë)
Lens ka transferuar mesfushorin francez Michael Cuisance nga Hertha Berlin për rreth 4 milionë paund. Ai pritet të zëvendësojë Adrien Thomasson, i cili është larguar drejt Rennes.
Alejo Veliz – nga Tottenham te Bahia (£7.5 milionë)
Sulmuesi argjentinas Alejo Veliz është transferuar përfundimisht te Bahia. Pas huazimeve te Sevilla, Espanyol dhe Rosario Central, ai i ka dhënë fund aventurës së tij te Tottenham.
Ansu Fati – nga Barcelona te Monaco (£9 milionë)
Monaco ka blerë përfundimisht Ansu Fatin për 9 milionë paund. Ish-talenti i madh i Barcelonës, që dikur trashëgoi fanellën me numrin 10 të Lionel Messit, firmosi kontratë katërvjeçare me klubin francez.
Alejandro Grimaldo – nga Bayer Leverkusen te Atletico Madrid (£19 milionë)
Atletico Madridi ka siguruar shërbimet e mbrojtësit Alejandro Grimaldo. Spanjolli largohet nga Bayer Leverkusen pas tre sezonesh të suksesshme për t’iu bashkuar skuadrës së Diego Simeones.
Pascal Struijk – nga Leeds United te Brighton (£20 milionë)
Brighton ka gjetur zëvendësuesin e Jan Paul van Hecke duke transferuar Pascal Struijk. Mbrojtësi holandez ka firmosur kontratë pesëvjeçare.
Mathys Detourbet – nga Troyes te Manchester City (£21.5 milionë)
Manchester City ka transferuar talentin francez Mathys Detourbet nga Troyes. Megjithatë, ai pritet të huazohet menjëherë për të fituar më shumë eksperiencë.
Piero Hincapie – nga Bayer Leverkusen te Arsenal (£34.5 milionë)
Arsenali ka bërë të përhershëm transferimin e Piero Hincapies, pasi aktivizoi klauzolën e blerjes. Mbrojtësi ekuadorian zhvilloi 39 ndeshje sezonin e kaluar me “Topçinjtë”.
Nico Paz – nga Real Madrid te Como (£52 milionë)
Como ka arritur marrëveshje me Real Madridin për ta mbajtur Nico Paz në Itali. Mesfushori argjentinas, një nga zbulimet e Serie A sezonin e kaluar, do të vazhdojë të luajë nën drejtimin e Cesc Fabregas, ndërsa madrilenët ruajnë të drejtën për ta rikthyer në të ardhmen.
Jeremy Jacquet – nga Rennes te Liverpool (£60 milionë)
Liverpool ka finalizuar transferimin e mbrojtësit Jeremy Jacquet, marrëveshje e arritur që në shkurt. Francezi tashmë është bashkuar me skuadrën e Andoni Iraolës për fazën përgatitore.
Gonçalo Ramos – nga PSG te Milan (£60 milionë)
Milani ka realizuar transferimin më të shtrenjtë në historinë e klubit duke paguar 60 milionë paund për Gonçalo Ramos. Sulmuesi portugez largohet nga PSG për të marrë rolin e titullarit në “San Siro” nën drejtimin e Ruben Amorimit. /GazetaExpress/
