Serbia është përfshirë nga tensione të shtuara të shtunën, përpara mbajtjes së një tubimi të madh në mbështetje të presidentit Aleksandër Vuçiq, i cili është zotuar se do të rimarrë kontrollin pas muajsh protestash të vazhdueshme kundër korrupsionit që kanë lëkundur seriozisht pushtetin e tij.
Lëvizja protestuese, e cila ka marrë përmasa mbarëkombëtare, është udhëhequr kryesisht nga studentët universitarë. Ata po kërkojnë drejtësi për viktimat që humbën jetën në nëntor, si pasojë e shembjes së strehës së një stacioni treni në Novi Sad – një tragjedi që ka nxitur reagime të forta në opinionin publik, raporton AP.
Autoritetet serbe kanë ndërmarrë veprime për të shtypur këtë lëvizje, përfshirë marrjen në pyetje të studentëve e aktivistëve dhe kërcënimet me masa ligjore për të ndaluar protestat.
Në përgatitje për tubimin e së shtunës, autoritetet kanë mbyllur një zonë qendrore në Beograd, pranë ndërtesës së parlamentit, ku janë vendosur skena koncertesh, tenda dhe tezga ushqimi për mijëra mbështetës nacionalistë që janë transportuar me autobusë, madje edhe nga shtete fqinje si Kosova dhe Bosnja.
Një park pranë pallatit presidencial është rrethuar me dhjetëra traktorë, në mbrojtje të Vuçiqit.
Ndërsa tensionet rriten, studentët protestues u kanë bërë thirrje banorëve të Beogradit që të qëndrojnë larg tubimit të Vuçiqit.
Vuçiqi, që pritet të adresohet në mbrëmje, ka thënë se do t’i parashtrojë kërkesat e tij për kthimin e rendit dhe ligjit dhe për të rifilluar ligjëratat në universitete javën e ardhshme. Ai i ka cilësuar studentët protestues si “terroristë” që dëshirojnë ta shkatërrojnë shtetin.
