U kap duke mashtruar me çmime konsumatorin në Mitrovicë, Riga Pharm e Arta Zeqirit gjobitet vetëm 1 mijë euro (Dokument)

Në Kosovë zakonisht janë raportuar raste të mashtrimeve me çmime nga marketet, por duket se ky fenomen po zgjerohet edhe në sektorë të tjera. Një rast i shitjes së produktit me çmim më të lartë në arkë se sa në raft është zbuluar edhe në barnatoren “Riga Pharm” në Mitrovicë.

Veriu.info ka siguruar një vendim të Inspektoratit Qendror të Mbikëqyrjes së Tregut me të cilin “Roga Pharm” Sh.P.K. është gjobitur me 1 mijë euro, pasi që është kapur duke shitur produkte me çmim më të lartë se sa në banderolë.

Në arsyetimin e vendimit të siguruar nga Veriu.info, thuhet se inspektimi është kryer pas një ankese të një konsumatori të bërë më 12 mars 2026, ku është vërtetuar se çmimi në banderolë ishte më i ulët se sa çmimi me të cilin është shitur produkti.

Produkti me çmim prej 14.42 euro në banderolë/raft konsumatorit iu ka shitur me çmim prej 20.81 euro në një barnatore të “Riga Pharm” në Mitrovicë, raporton Veriu.info.

“Inspektorët inspektuan Operatorin Ekonomik dhe vertetuan se çmimi nuk kishte qenë i njëjti raft/banderolë – arke për produktin me çmim ne banderolë 14.42€, e në arkë ka kaluar me çmim 20.81€. Atenzio plus 80mg -+ 12.5mg me çmim në banderolë 4.44€ e në arkë 4.44€. Tenlop H 50mg/ 12.5mg 4.55€ (pa çmim në banderolë). Si dhe në momentin e Inspektimit ky produkt Rosamib 20mg / 10mg ishte me çmim në banderolë 14.42€, e në arkë kaloi me çmim 20.81€. (ashtu siç e ka dërguar ankesën konsumatori). Ky produkt nuk ishte në përputhje me çmimin në raft/banderolë – Arke (me çmimin në kuponin fiskal)”, thuhet në vendimin e inspektorëve të IQMT-së së Ministrisë së Tregtisë.

Në vendimin e IQMT-së thuhet që nëse gjoba prej 1 mijë euro paguhet brenda 15 ditësh, atëherë “Riga Pharm” Sh.P.K. lirohet nga 50% e shumës së saj.

Veriu.info ka tentuar të marrë një qëndrim nga “Riga Pharm” Sh.P.K. për këtë vendim të Inspektoratit Qendror të Mbikëqyrjes së Tregut, por deri në momentin e publikimit të artikullit nuk ka pranuar përgjigje për pyetjet e dërguara.

Ndryshe, “Riga Pharm” Sh.P.K. është një rrjet i barnatoreve në Kosovë, me mbi 70 njësi në gjithë territorin e Kosovës. Pronare me 100% të aksioneve në këtë kompani është Arta Zeqiri.