Ai në një intervistë për Blic Interview me Astrit Gashin, tha se ka qenë vendim i kryetarit që ai të mos jetë në kryesi por që problemi është se a ka qenë statuare apo jo ky veprim.
“Nuk ka qenë e rëndësishme në fakt qenia apo mosqenia në kryesinë e Lidhjes Demokratike të Kosovës, është një institucion i respektuar i LDK-së ku merren vendime ekzekutive, është një organizim i ri për të cilin kryetari aktual i LDK-së e ka parë si të arsyeshme që të jetë ashtu, unë nuk kam problem me këtë pjesë. Kam problem me pjesën se a është statutare apo nuk është veprimi, besoj se duhet t’i japë legjitimitet Këshilli i përgjithshëm kryesisë”, ka thënë ai.
Gashi ka treguar se si vepron Këshilli i Përgjithshëm për kryesinë.
“Statuti parasheh që me propozim të kryetarit dy të tretat e kryesisë i propozon kryetari dhe një të tretën e propozon këshilli dhe e miraton këshilli. Nuk ka një trup tjetër që mundet me zgjedhë kryesinë e partisë, por është çështje të cilën tashmë nuk mundemi me bërë shumë temë sepse po shkojmë drejt zgjedhjeve dhe është çështje e organizimit të brendshëm politik”, është shprehur ish deputeti.
Sipas tij, me këtë çështje nuk ia vlen të merret më shumë.
Por, thotë se ia vlen të merret me atë se si LDK të bëhet parti fituese.
“Ia vlen me u marrë shumë se si LDK të bëhet fituese, si LDK të bëhet parti garuese dhe konkurruese në zgjedhjet e ardhshme dhe cili është orientimi strategjik i LDK-së. Këto janë temat me të cilat duhet të merremi realisht, sepse në fund të fundit një parti politike është organizim vullnetar i njerëzve të cilët kanë këndvështrime dhe interesa të përbashkëta politike, mbi bazën e të cilave ata rrugëtojnë bashkë”, ka vlerësuar Gashi.
Ai ka dhënë dhe mendimin e tij për kryesinë e re.
“Kjo mbetet të shihet në rezultate dhe në mënyrën e organizimit të partisë. Ata njerëz të gjithë që i njoh, që kanë qenë nëpër betejat ndryshe politike, disa të suksesshëm, disa të pasuksesshëm. Por nuk ka të bëjë kjo me individin, ka të bëjë me sistemin dhe procesin. Pra, sistemi i LDK-së ka kohë që nuk po funksionon dhe nuk po arrin me kapitalizuar votën në favor të LDK-së dhe pastaj orientimi politik dhe strategjik i LDK-së është ajo që duhet të na bashkojë pa marrë parasysh në funksionet ku jemi apo mund të jemi. Me rëndësi është në kuadër të organizimit të LDK-së të vendosen njerëzit aty ku mundin me e dhënë maksimumin e tyre në funksion të zhvillimit të tyre politik dhe në funksion të zhvillimit politik të partisë. Pra, kjo është një menaxhim që duhet t’i kishte partia, të cilin unë e shoh si të domosdoshëm për partinë. Vendosja e njerëzve në pikat ku ata japin maksimumin e tyre, rrallë që të kapitalizojmë politikisht për vete dhe për partinë dhe bashkërisht të zhvillojmë përpara partinë dhe Kosovën. Pra, kjo është ajo mënyrë qysh unë e shoh organizimi politik të LDK-së”, ka deklaruar Arben Gashi.
Po ashtu, ai ka folur për selektimin si është bërë për të qenë pjesë e kryesisë.
“Nuk i kthehem pyetjes për kryetarin e partisë i cili ka bërë atë propozim. Ka kriterë balancues rajonale të degëve, afërsisë politike e tjerë e tjerë. Po”, ka shtuar tutje.
“Mendoj se është nënvlerësuar shumë, por si duket pritet në një ribashkim tjetër që të lihet hapësira për disa persona të tjerë që mund të vijnë nga kjo zonë. Por në përgjithësi ato balancat e brendshme partiake kësaj radhe nuk janë respektuar shumë, por ta shohim. Kjo bëhet një luftë për rezultat zgjedhor dhe ne duhet të angazhohemi të gjithë për një rezultat zgjedhor për LDK-në dhe pastaj edhe për individët brenda LDK-së dhe të shohim rezultatin final”, ka thënë Gashi.
