Ministri i Ekonomisë në Itali, Giancarlo Giorgetti të shtunën ka paralajmëruar kundër vendosjes së tarifave hakmarrëse ndaj Shteteve të Bashkuara.
Duke folur në një forum biznesi pranë Milanos, Giorgetti tha se Italia po synonte një “de-përshkallëzim”.
“Ne duhet të shmangim nisjen e një politike kundër tarifave që mund të jetë e dëmshme për të gjithë dhe veçanërisht për ne” – ka thënë ai sipas “Reuters”.
Sipas planeve të Trump, Italia, e cila ka një suficit të madh tregtar me Shtetet e Bashkuara, do t’i nënshtrohet një tarife të përgjithshme prej 20 për qind së bashku me vendet e tjera të Bashkimit Evropian.
Ndërkohë, Bashkimi Evropian para pak ditësh bëri me dije se po përgatit kundërmasa, pas vendosjes së këtyre tarifave.
“Njoftimi i presidentit Trump për tarifat ndaj të gjithë botës, duke përfshirë edhe Bashkimin Evropian, është një goditje e madhe për ekonominë botërore. Më vjen shumë keq për këtë zgjidhje” – ka thënë Ursula von der Leyen, presidentja e Komisionit Evropian, duke shtuar se efekti i tarifave do të ndihet menjëherë.
“Europa është gati të përgjigjet” – ka shtuar ajo.
“Ne tashmë po finalizojmë paketën e parë të kundërmasave në përgjigje të tarifave për çelikun dhe tani po përgatitemi për kundërmasa të mëtejshme për të mbrojtur interesat dhe bizneset tona nëse negociatat dështojnë”.
