Eugen Cakolli, duke reaguar lidhur me vendimin dënues të speciales ndaj ish-krerëve të UÇK’së, ka thënë se është e papranueshme që, më shumë se një ditë pas aktgjykimit ndaj ish-krerëve të UÇK-së, udhëheqja politike dhe institucionale e Kosovës ende nuk po e trajton këtë si çështje shtetërore.
Cakolli ka thënë edhe se, ky spektër politik, për vite e vite, na ka folur për UÇK-në dhe interesin e Kosovës me pretendimin se e kupton më mirë se kushdo peshën e tyre, kurse sot, përgjigja e tyre është ajo e një grumbulli partish e institucionesh që reagojnë veçmas.
Postimi:
Asnjëherë më të papërfaqësuar institucionalisht e politikisht se sot!
Është e papranueshme që, më shumë se një ditë pas aktgjykimit ndaj ish-krerëve të UÇK-së, udhëheqja politike dhe institucionale e Kosovës ende nuk po e trajton këtë si çështje shtetërore. Pra, as përmasat e këtij zhvillimi nuk po mjaftojnë që përgjegjësia për vendin të marrë përparësi.
Ky spektër politik, për vite e vite, na ka folur për UÇK-në dhe interesin e Kosovës me pretendimin se e kupton më mirë se kushdo peshën e tyre. E tash, përballë një aktgjykimi që kërkon prej tij ta dëshmojë këtë me veprime, përgjigjja mbetet ajo e një grumbulli partish e institucionesh që reagojnë veçmas.
Angazhimi i deritanishëm, i mbështetur kryesisht në nisma individuale e qytetare, nuk e shkarkon politikën nga përgjegjësia që ka për situatën në tërësi. Vazhdimi me deklarime e nisma të ndara e shpërfaq sa thellë kjo klasë politike e ka zhytur vendin në vogëlsinë e përplasjeve partiake, saqë as një ngjarje e kësaj përmase nuk po mjafton për ta nxjerrë prej asaj logjike.
